İran Prezidenti Məsud Pezeşkian ötən il İsrail tərəfindən başladılan və 12 gün davam edən hərbi qarşıdurmanın ildönümü ilə bağlı bəyanatla çıxış edib. Dövlət başçısı İran xalqının nümayiş etdirdiyi birliyi və dözümlülüyü yüksək qiymətləndirib.
"Operativ Məlumat Mərkəzi-OMM" "IRNA" agentliyinə istinadən xəbər verir ki, Prezident Pezeşkian sözügedən müharibəni ölkənin milli həmrəyliyinin rəmzi adlandırıb və həlak olanları ehtiramla yad edib.
O, İsrail hökumətinin hərbi rəhbərlərə və strateji obyektlərə qarşı hücumlarla İran cəmiyyətini zəiflədəcəyi və ölkədə qeyri-sabitlik yaradacağı ilə bağlı hesablamalarının yanlış olduğunu bildirib.
Pezeşkianın sözlərinə görə, İran xalqının göstərdiyi əzm və müqavimət, həmçinin silahlı qüvvələrin yüksək hazırlığı İsrailin qarşısına qoyduğu hədəflərə çatmasına mane olub. İran lideri qeyd edib ki, bu amillər nəticə etibarilə qarşı tərəfi atəşkəsi qəbul etməyə məcbur edib.
Xatırladaq ki, münaqişə ötən il iyunun 13-də İsrailin İrana qəfil hücumu ilə başlayıb. Həmin hadisələr zamanı yüksək rütbəli hərbçilər, nüvə sahəsində çalışan alimlər, siyasətçilər və mülki şəxslər həyatını itirib. Daha sonra ABŞ-nin da İsfahan, Natanz və Fordovdakı nüvə obyektlərinə hücumlarla müdaxilə etdiyi qarşıdurma iyunun 24-də başa çatıb.
