Ermənistanın Baş naziri Nikol Paşinyan və Türkiyə Prezidenti Rəcəb Tayyib Ərdoğan arasında telefon danışığı baş tutub.
"Operativ Məlumat Mərkəzi-OMM" xəbər verir ki, bu barədə Ermənistan Baş nazirinin administrasiyası məlumat yayıb.
Bildirilib ki, telefon danışığı zamanı tərəflər ikitərəfli münasibətlərə dair məsələləri müzakirə edib, Ermənistan-Türkiyə əlaqələrinin intensivləşməsindən məmnunluqlarını ifadə ediblər.
Nikol Paşinyan Türkiyə Prezidentini qarşıdan gələn Qurban bayramı münasibətilə təbrik edib. Prezident Ərdoğan isə Ermənistanın Baş nazirini 51-ci doğum günü münasibətilə təbriklərini çatdırıb.
Söhbət zamanı Türkiyənin vitse-prezidenti Cövdət Yılmazın Avropa Siyasi Birliyinin sammitində iştirak etmək üçün Ermənistana səfəri, Ermənistan və Türkiyə arasında birbaşa ticarət prosedurlarının yaradılması, həmçinin Axalkalaki-Qars dəmir yolunun Ermənistandan ixrac və idxal üçün açılması ilə bağlı məsələlər də müzakirə olunub.
Tərəflər regional əməkdaşlıq və iqtisadi əlaqələrin inkişafı istiqamətində dialoqun davam etdirilməsinin vacibliyini vurğulayıblar.
