Ermənistanın Baş naziri Nikol Paşinyan Axalkalaki-Qars dəmir yolu xəttinin fəaliyyətə başlaması ilə bağlı məlumat yayıb. O, bu barədə özünün sosial media hesabında paylaşım edib.
Paşinyan qeyd edib ki, Axalkalaki-Qars dəmir yolu, eləcə də Azərbaycan dəmir yolu xətləri artıq Ermənistanın ixrac və idxal imkanları üçün açıqdır. Baş nazir bunu ölkəsinin iqtisadiyyatı üçün əhəmiyyətli hadisə kimi qiymətləndirərək, Türkiyə və Gürcüstandakı tərəfdaşlara təşəkkürünü bildirib.
Hökumət başçısı hazırda Ermənistanın Gürcüstan və Azərbaycan əraziləri vasitəsilə Rusiya ilə, həmçinin Rusiya və Qazaxıstan üzərindən Çinlə dəmir yolu əlaqəsinin olduğunu xatırladıb. İndi bu marşrutlara Gürcüstan və Türkiyədən keçməklə Avropa İttifaqına çıxışı təmin edən yeni istiqamət də əlavə olunub.
Bundan başqa, Paşinyan yaxın gələcəkdə bir sıra yeni layihələrin icrasının gözlənildiyini vurğulayıb:
- Ermənistanla Türkiyə arasında birbaşa dəmir yolu əlaqəsinin bərpası;
- Ermənistanla Azərbaycan arasında dəmir yolu əlaqəsinin işə salınması;
- Naxçıvan vasitəsilə Ermənistanla İran arasında dəmir yolu əlaqəsinin təmin edilməsi.
Baş nazir qeyd edib ki, "TRIPP" layihəsinin reallaşması ilə bu nəqliyyat əlaqələrinin yaxın zamanda istifadəyə verilməsi nəzərdə tutulur.
