"Ukraynanın əksər hissəsində hələ də ballistik raketləri ələ keçirə bilən hava hücumundan müdafiə sistemləri yoxdur".
“Operativ Məlumat Mərkəzi-OMM” xəbər verir ki, bu sözləri Ukrayna Prezidenti Volodimir Zelenski deyib.
Zelenskinin sözlərinə görə, onun hava hücumundan müdafiə ilə bağlı əvvəlki açıqlamaları tərəfdaşlarına qarşı tənqid deyil, diqqəti real vəziyyətə cəlb etmək cəhdi idi:
“Patriot sistemlərimizin harada yerləşdiyini deməyəcəyəm. Amma ölkəmizin 80%-də belə anti-ballistik raket sistemləri yoxdur”.
O, Ukraynanın müdafiəsini gücləndirmək üçün imkanlar axtarmağa davam etdiyini vurğulayaraq əlavə edib ki, kifayət qədər sistem olmasa belə Kiyev tərəfdaşları ilə onların alışlarını maliyyələşdirmək üçün əməkdaşlıq edir.
"Sistemləri bizə verməsələr belə, biz tərəfdaşlarımızla birlikdə onlar üçün pul tapdıq".
O, şəxsən Almaniya, Norveç, Şimali Avropa ölkələri və Kanada nümayəndələri ilə danışıqlar apardığını qeyd edərək, hava hücumundan müdafiə sistemlərinin çox baha olduğunu vurğulayıb.
"Onların hər sistem üçün qiyməti 1,5 ilə 2 milyard arasındadır. Raketin qiyməti isə 2 ilə 3 milyon arasındadır", - o əlavə edib.
Zelenski bu məqsədlər üçün əlavə vəsait ayırmağa razı olduğunu açıqlayıb.
Bundan əvvəl Ukrayna Avropa ölkələrini ballistik raketlərə qarşı yeni vasitələr yaratmaq üçün texnoloji səylərini birləşdirməyə çağırmışdı.
