Afət Ziyadqızı
İngiltərə Premyer Liqasında çıxış edən "Nyukasl" klubunun aparıcı futbolçularından biri olan Brunu Gimarays üçün tələb etdiyi transfer məbləği müəyyənləşib.
"Operativ Məlumat Mərkəzi-OMM" xəbər verir ki, braziliyalı yarımmüdafiəçinin xidmətində maraqlı olan "Arsenal" klubu onun transferi ilə bağlı danışıqları davam etdirir.
Məşhur insayder Nikolo Skiranın yaydığı xəbərə əsasən, "Arsenal" rəhbərliyi 26 yaşlı futbolçu üçün 90 milyon avro məbləğində təklif hazırlayır. Lakin "Nyukasl" rəhbərliyi komandanın əsas oyunçularından birini satmaq niyyətində deyil.
Klubun mövqeyinə görə, Brunu Gimaraysın transferi üçün 120 milyon avrodan aşağı olan heç bir təklif nəzərdən keçirilməyəcək.
Məlumata əsasən, futbolçunun şəxsi istəyi də transfer prosesində mühüm rol oynaya bilər. İddialara görə, Gimarays karyerasını "Arsenal"da davam etdirməkdə maraqlıdır və London klubu ilə 2031-ci ilə qədər nəzərdə tutulan şəxsi müqavilə şərtləri üzrə razılıq əldə edib.
Qeyd edək ki, Brunu Gimarays ötən mövsüm "Nyukasl"ın heyətində 41 oyuna çıxıb. Braziliyalı futbolçu həmin qarşılaşmalarda 9 qol vurub və 8 məhsuldar ötürmə ilə yadda qalıb.
İngiltərə Premyer Liqasının yeni mövsümünün avqust ayında başlayacağı nəzərə alınaraq, "Arsenal"ın yaxın günlərdə daha yüksək məbləğdə yeni təkliflə çıxış edəcəyi gözlənilir.
