Afət Ziyadqızı
Ermənistanın Baş naziri Nikol Paşinyan Rusiyanın Yekaterinburq şəhərində keçirilən “İnnoprom-2026” beynəlxalq sənaye sərgisini ziyarət edib.
“Operativ Məlumat Mərkəzi-OMM” xəbər verir ki, bu barədə Ermənistan hökuməti məlumat yayıb.
Məlumata görə, Nikol Paşinyan səfər çərçivəsində sərgi pavilyonlarını gəzərək sənaye və yüksək texnologiyalar sahəsində təqdim olunan yeniliklərlə tanış olub.
Bildirilir ki, tədbirdə Rusiya, Belarus, Qırğızıstan və Qazaxıstanın baş nazirləri, eləcə də İndoneziyanın sənaye naziri iştirak ediblər.
Qeyd olunur ki, hökumət rəsmiləri tibb, dəzgahqayırma və maşınqayırma sahələrində nümayiş etdirilən innovativ həllərlə tanış olub, həmçinin Belarus istehsalı olan “MAZ 303T21” markalı yeni trolleybusu sınaqdan keçiriblər.
Məlumata əsasən, iyulun 6–9-da keçirilən “İnnoprom-2026” sərgisində Nikol Paşinyan spiker qismində də çıxış edib.
Bildirilir ki, bu il sərginin tərəfdaş ölkəsi qismində ilk dəfə İndoneziya iştirak edir. Paşinyan səfərlə bağlı görüntüləri sosial şəbəkə hesabında da paylaşıb.
