"Netanyahu Qəzzaya hücumlardan sonra mərhələli plan üzərində işləyir" - İsrail mediası

İsrailin Baş naziri Binyamin Netanyahunun təxminən 4 aydır hücum və blokada altında olan Qəzza zolağının gələcəyi ilə bağlı çoxmərhələli və uzunmüddətli plan layihəsi üzərində çalışdığı və bu layihəni ABŞ ilə paylaşdığı açıqlanıb.

"Operativ Məlumat Mərkəzi-OMM" xəbər verir ki, bu barədə İsrailin “Maariv” nəşri məlumat yayıb.

Netanyahunun ABŞ rəsmiləri və əlaqədar tərəflərlə paylaşılan planın birinci mərhələsinə görə, hücumlar bitdikdən sonra Qəzza zolağında qurulacaq hərbi idarə keçid dövründə oraya daxil olacaq humanitar yardımların və mülki əhalinin inzibati işləri ilə məşğul olacaq.

Planın ikinci mərhələsində Səudiyyə Ərəbistanı, Misir, Mərakeş,Birləşmiş Ərəb Əmirlikləri (BƏƏ) Qəzza zolağında və Bəhreynin iştirakı ilə qurulacaq ərəb koalisiyası ilə əməkdaşlıqda Fəth və HƏMAS-ın olmadığı yeni Fələstin administrasiyası qurulacaq.

Planın üçüncü mərhələsində Qəzzada qurulacaq yeni Fələstin administrasiyası uğur və sabitliyə nail olarsa, bu idarənin İordan çayının qərb sahilinə də hakim olması üçün yeni islahat hazırlanacaq.

Son mərhələdə plan uğurla həyata keçirilərsə, 2-4 il ərzində işğal altında olan Qəzza və İordan çayının qərb sahilindəki Fələstin rəhbərliyi ordusuz bir hökumət quracaq.