Milli Kibertəhlükəsizlik Agentliyinin nizamnamə fondunun məbləği 442 498 manat həcmində müəyyən edilib. Bu barədə Prezident İlham Əliyevin Fərmanı ilə yaradılan qurumun Nizamnaməsində məlumat verilib.
Sənədə əsasən, agentliyin əmlakı aşağıdakı mənbələr hesabına formalaşır:
- Nizamnamə fondu;
- Təsisçi tərəfindən verilən əmlak;
- Fəaliyyətdən əldə olunan gəlirlər;
- İanələr, qrantlar və cəlb edilən investisiyalar;
- Qanunvericiliklə qadağan olunmayan digər vəsaitlər.
Agentlik öz əmlakından yalnız Nizamnamədə göstərilən məqsədlərə uyğun şəkildə istifadə etmək səlahiyyətinə malikdir. Qurum vergi və digər məcburi ödənişləri yerinə yetirdikdən sonra özünün, habelə tabeliyindəki qurumların fəaliyyətindən əldə olunan vəsaitlər üzərində müstəqil sərəncam vermək hüququna sahibdir. Sərəncamda qalan vəsait hesabına nazirlik əməkdaşlarına əlavə mükafatların verilməsi nəzərdə tutulur. Nizamnamədə nəzərdə tutulmayan hallarda isə agentliyin mənfəəti yalnız nazirliyin qərarı ilə dövlət büdcəsinə köçürülə bilər.
