Rusiya Xarici Kəşfiyyat Xidmətinin (SVR) direktoru Sergey Narışkin ABŞ Mərkəzi Kəşfiyyat İdarəsinin (CIA) rəhbəri Con Retkliff ilə Moskvada keçirdiyi görüşü təsdiqləyib.
“Operativ Məlumat Mərkəzi – OMM” xəbər verir ki, bu barədə “RIA Novosti” məlumat yayıb.
Narışkin jurnalistlərə açıqlamasında görüşün baş tutduğunu təsdiqləyib və bunun qeyri-adi hal olmadığını bildirib.
SVR rəhbərinin sözlərinə görə, görüş zamanı kəşfiyyat xidmətlərinin birbaşa səlahiyyətlərinə aid olan bir sıra məsələlər ətrafında fikir mübadiləsi aparılıb.
Narışkin kəşfiyyat orqanlarının fəaliyyət sahəsinin həssas və xüsusi xarakter daşıdığını vurğulayıb. O, bu cür təmasların kəşfiyyat rəhbərlərinin gündəlik fəaliyyətinin ayrılmaz hissəsi olduğunu qeyd edib.
Xatırladaq ki, Con Retkliff avqustun 25-də səhər saatlarında Rusiyaya səfər edib.
ABŞ Prezidenti Donald Tramp CIA rəhbərinin Moskva səfərini “adi, rutin bir səfər” kimi xarakterizə edib və hadisəyə böyük siyasi əhəmiyyət verilməməli olduğuna işarə edib.
