Milli Məclisin yaz sessiyası çərçivəsində növbəti plenar iclası mayın 26-na təyin edilib. İclasın gündəliyinə ümumilikdə 13 məsələnin daxil edildiyi bildirilir.
Gündəlikdə yer alan əsas məsələlər aşağıdakılardır:
- Gender bərabərliyinin təmin olunmasına nəzarəti həyata keçirən icra hakimiyyəti orqanının 2025-ci il üzrə fəaliyyəti haqqında məlumat;
- Azərbaycan Ali Məhkəməsi, habelə Bakı, Şəki və Şirvan apellyasiya məhkəmələrinin hakimlərinin təyin edilməsi;
- Hakim kadr dəyişiklikləri: N.T.Əliyevin Gəncə Apellyasiya Məhkəməsinin hakimi vəzifəsindən azad edilməsi və B.M.Məmmədovun Sumqayıt Apellyasiya Məhkəməsinin hakimi təyin edilməsi;
- "Maliyyə icarəsi haqqında" qanun layihəsi (üçüncü oxunuş);
- Mülki, Vergi, Rəqabət məcəllələri və bir sıra digər qanunvericilik aktlarında, o cümlədən "Banklar haqqında", "İcbari sığortalar haqqında" və "Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" qanunlarda dəyişiklik edilməsi barədə qanun layihəsi (üçüncü oxunuş);
- "Hərbi xidmətkeçmə haqqında" Əsasnamənin təsdiq edilməsi və "Hərbi vəzifə və hərbi xidmət haqqında" qanunlarda dəyişiklik edilməsi (üçüncü oxunuş);
- "Vətəndaşların müraciətləri haqqında" qanunda dəyişiklik (üçüncü oxunuş);
- "Diplomatik xidmət haqqında" qanunda dəyişiklik (ikinci oxunuş);
- İnzibati Xətalar Məcəlləsində dəyişiklik edilməsi haqqında qanun layihəsi (birinci oxunuş).
