Peruda fevralın 22-dən bəri itkin düşmüş Rusiya istehsalı olan "Mi-17" tipli hərbi helikopterin qalıqları aşkar edilib.
“Operativ Məlumat Mərkəzi-OMM”Peru Hava Qüvvələrinin yaydığı məlumata istinadən xəbər verir ki, helikopter uçuş nöqtəsindən təxminən 300 kilometr uzaqlıqda, Çala rayonunun kənd ərazisində qəzaya uğrayıb.
Helikopter Arekipa şəhərində baş verən sel fəlakətindən zərərçəkənlərin təxliyəsi və xilasetmə işlərinə cəlb olunubmuş. Axtarış-xilasetmə qrupları göyərtədə olan 4 heyət üzvü və 11 sərnişinin hamısının öldüyünü təsdiqləyib.
Həlak olan 15 nəfərdən 7-nin uşaq olduğu bildirilir.
Arekipa bölgəsinin polis rəisi general Antonio Lamadrid mətbuata verdiyi açıqlamada helikopterin enkazının yaşayış məntəqələrindən uzaq bir nöqtədə tapıldığını qeyd edib.
Hazırda qəzanın dəqiq səbəblərinin müəyyənləşdirilməsi məqsədilə rəsmi təhqiqat başladılıb.
