OMM Redaksiyası
“Microsoft” fərdi kompüterlərdə işləyən yeni süni intellekt kodlaşdırma modelini və avtonom agentlərin məlumatlara icazəsiz çıxışını məhdudlaşdırmağa yönələn təhlükəsizlik texnologiyasını təqdim edib. Şirkət, həmçinin “Nvidia” texnologiyası ilə təchiz olunmuş “Surface Laptop Ultra” noutbukunu nümayiş etdirib.
Elanlar oktyabrın 7-də San-Fransiskoda keçirilən təqdimat tədbirində açıqlanıb. Tədbirdə “Microsoft”un baş icraçı direktoru Satya Nadella və “Nvidia”nın baş icraçı direktoru Jensen Huang iştirak ediblər.
Şirkətlər kodlaşdırma köməkçiləri və biznes proseslərini avtomatlaşdıran tətbiqlər də daxil olmaqla, süni intellekt alətlərini birbaşa fərdi kompüterlərdə işlətməyi hədəfləyir. Bu yanaşma bulud xidmətlərindən asılılığı azalda bilər.
Huang bildirib ki, yeni texnologiyalar proqram təminatının hazırlanması üsulunu dəyişə bilər və proqramçılar tətbiq yaratmaq, modellər qurmaq və proqram təminatı hazırlamaq üçün süni intellektdən daha çox istifadə edəcəklər.
MXC agentlərin fəaliyyətini məhdudlaşdıracaq
“Microsoft”un təqdim etdiyi Microsoft Execution Containers (MXC) sistemi süni intellekt agentlərini nəzarət olunan mühitlərdə təcrid etməyi, onların fayllara, şəbəkələrə və həssas məlumatlara çıxışını məhdudlaşdırmağı nəzərdə tutur.
Huangın sözlərinə görə, MXC təşkilatlara agentlərin hansı məlumatlara və resurslara çıxış əldə edə biləcəyini dəqiq müəyyənləşdirməyə imkan verəcək. O, agentlərin “tərkibi dəyişdirilə bilən icra sandboxında” saxlanıldığını bildirib.
“Microsoft”un açıqlamasına əsasən, sistem süni intellekt agentlərinin gördüyü işləri qeydə alır. Bu, təhlükəsizlik qruplarına fəaliyyətə nəzarət etməyə, şübhəli davranışı araşdırmağa və zərurət yaranarsa, çıxışı məhdudlaşdırmağa imkan verəcək. Bununla belə, bu qorunma vasitələrinin real şəraitdə nə dərəcədə effektiv olacağı hələ məlum deyil.
Şirkət “OpenAI” və “Anthropic”in də süni intellekt agentlərinin təhlükəsizliyini artırmaq üçün MXC-dən istifadə edəcəyini açıqlayıb. Texnologiya “Windows”, macOS və Linux sistemlərində işləmək üçün nəzərdə tutulsa da, “Microsoft” “Windows” ilə daha dərin inteqrasiya imkanlarının olacağını bildirib.
Yeni noutbukda 128 GB yaddaş olacaq
“Microsoft” süni intellekt imkanlarını buluddan fərdi kompüterlərə daşımaq strategiyasını “hibrid intellekt” adlandırır. Bu yanaşma cihazların emal gücünü bulud hesablamaları ilə birləşdirir. Modellərin kompüterdə işlədilməsi internet bağlantısına ehtiyacı azalda, bəzi həssas məlumatların isə cihazda qalmasına şərait yarada bilər. Bulud emalı xərclərinin azalması da mümkün üstünlüklər sırasındadır, lakin nəticə istifadə olunan avadanlıqdan və modelin mürəkkəbliyindən asılıdır.
Nadella istifadəçilərin süni intellekt imkanlarının yerli cihaz və bulud arasında fasiləsiz işləməsini gözləyəcəklərini deyib. Onun sözlərinə görə, gələcəkdə istifadəçilər tapşırığın cihazda, yoxsa buludda icra olunduğunu fərqləndirməyə ehtiyac duymayacaqlar.
Proqram təminatı tərtibatçıları və məzmun yaradıcıları üçün nəzərdə tutulan “Surface Laptop Ultra” “Nvidia”nın RTX Spark texnologiyası ilə təchiz edilib. Noutbuk 128 giqabayta qədər vahid yaddaş, PixelSense sensor ekranı və bir petaflop süni intellekt emal gücü təklif edir.
“Microsoft” cihazın rəqib noutbuklarla müqayisədə 2,5 dəfə yüksək istilikötürmə tutumuna malik olduğunu, çəkisinin isə təxminən 4,5 funt — iki kiloqramdan bir qədər artıq olduğunu bildirib. Noutbukda Magnetic Connect adlı maqnitli USB-C enerji doldurma sistemi də var.
“Surface Laptop Ultra”nın qiyməti 2 599 dollardan başlayır, ən yüksək komplektasiyanın qiyməti isə 5 899 dollara çatır. Cihaz üçün əvvəlcədən sifariş qəbul edilir; RTX Spark ilə təchiz olunmuş sistemlərin gələn həftədən göndərilməsinə başlanacağı gözlənilir.
“Microsoft” “Meta”nın Muse süni intellekt modelinin “Windows”da istifadəyə veriləcəyini də elan edib. “Call of Duty” video oyununun isə 2027-ci ildə RTX Spark sistemlərinə gələcəyi gözlənilir.
Elanlar süni intellektin fərdi kompüterlərdə işlədilməsinə doğru daha geniş keçidin tərkib hissəsidir. Bu texnologiya sürət, məxfilik və xərc baxımından üstünlüklər vəd etsə də, getdikcə daha müstəqil fəaliyyət göstərən süni intellekt sistemlərinin təhlükəsizliyi və məhsuldarlığı ilə bağlı suallar qalır.
