OMM Redaksiyası
“Metropolitan Museum of Art” 2027-ci il Kostyum İnstitutunun sərgisinin və Met Gala-nın gündəlik geyimlərin və adi materialların dizaynerlər tərəfindən sənət əsərinə çevrilməsini araşdıracağını açıqlayıb. AnewZ-in məlumatına görə, “extraORDINARY: Fashion and the Poetics of the Everyday” adlanan sərgini Kostyum İnstitutunun rəhbəri Endryu Bolton Stefani Kramer və Emili Muşabenin köməyi ilə təşkil edəcək.
Sərgi ziyarətçiləri köynək və cins şalvar kimi tanış geyimlərə, eləcə də kağız, alüminium və plastik kimi materiallara yenidən nəzər salmağa dəvət edəcək.
Elan dizayner Con Qallianoya həsr olunması planlaşdırılan əvvəlki sərginin ləğvindən sonra verilib. Bolton bildirib ki, yeni layihənin əvvəlki ideyanın əvəzi deyil, müstəqil konsepsiya olmasını istəyib, eyni zamanda onun iddiasını və müasir aktuallığını qorumağa çalışıb.
Gündəlik geyimlər sənət əsəri kimi
Sərgidə dizaynerlərin ağ köynək, trençkot, futbolka və şişmə gödəkçə kimi tanış geyimləri necə yenidən işlədiyi araşdırılacaq.
Açılış bölməsində yapon dizayner Cun Takahaşinin “Undercover” brendinin 2024-cü ilin payız kolleksiyasından nümunələr nümayiş olunacaq. Kolleksiya Vim Vendersin “Perfect Days” filminin təsiri ilə hazırlanıb.
Kolleksiyada kollaj və laylama üsulları adi geyimləri dəyişdirmək üçün istifadə olunub. Sərgi “Anrealage” brendindən Kunihiko Morinaqanın işi ilə yekunlaşacaq. Dizayner qeyri-adi forma və nisbətlərdən istifadə etməsi ilə tanınır.
Sərgidə, həmçinin Vircil Ablo, Canfranko Ferre, Conatan Anderson və Pyerpaolo Piççolinin işləri təqdim olunacaq.
“Common Matter” adlı ayrıca bölmədə dizaynerlərin atılmış materialları və tapılmış əşyaları geyimə çevirməsi araşdırılacaq. Burada “Maison Margiela”nın işi ilə yanaşı, materialları təkrar istifadə edib yenidən quran digər dizaynerlərin nümunələri də yer alacaq.
Bolton sərgidə dəyər, istehlak və sənətkarlıq məsələlərinin araşdırılacağını deyib. Onun sözlərinə görə, ucuz materialları dəyişdirmək dəbdəbəli parçalarla işləmək qədər bacarıq və əmək tələb edə bilər.
Sərgi Londonun səhnə tərtibatı üzrə “1009” studiyası ilə birgə hazırlanır. Bolton ziyarətçilərin təcrübənin bir hissəsinə çevrilməsini arzuladığını bildirib və onların sevimli gündəlik geyimlərində — futbolka, cins şalvar və kapüşonlu köynəklərdə gələ biləcəklərini söyləyib.
2027-ci il Met Gala mayın 3-də keçiriləcək, sərgi isə mayın 9-da ictimaiyyət üçün açılacaq. Sərgi 2028-ci il yanvarın 9-dək davam edəcək.
Sərginin sponsoru “Instagram” olacaq. Əsas maliyyə dəstəyini “Moncler”, əlavə dəstəyi isə “Condé Nast” təmin edəcək. Təhsil proqramlarına “Jordan Roth” dəstək verəcək.
