OMM Redaksiyası
Fransa millisinin yarımmüdafiəçisi Maykl Olise milli komandanın heyətində bir təqvim ili ərzində qeydə alınan məhsuldar fəaliyyət sayına görə Tyer Anrinin XXI əsr rekorduna yaxınlaşıb. Bu barədə “Opta” statistika xidməti məlumat yayıb.
Olise oktyabrın 5-də Millətlər Liqasında Belçika ilə keçirilən və Fransa millisinin 4:1 hesablı qələbəsi ilə başa çatan oyunda iki qol vurub, bir məhsuldar ötürmə edib.
Beləliklə, futbolçu 2026-cı ildə Fransa millisinin qollarında ümumilikdə 17 dəfə iştirak edib. O, yeddi qol vurub və 10 məhsuldar ötürmə verib.
XXI əsrdə Fransa millisində bir təqvim ili ərzində ən çox məhsuldar fəaliyyət göstəricisi Anriyə məxsusdur. O, 2003-cü ildə milli komandanın heyətində 19 dəfə qol və məhsuldar ötürmə ilə yadda qalıb. Olise bu göstəricini təkrarlamaq üçün daha iki məhsuldar fəaliyyətə ehtiyac duyur.
