NATO-nun Baş katibi Mark Rutte Rusiya və Ukrayna arasında gələcəkdə baş tutması gözlənilən sülh danışıqları ərəfəsində alyansın əsas vəzifəsinin Ukraynanın mövqeyini gücləndirmək olduğunu bildirib.
“Operativ Məlumat Mərkəzi-OMM” xəbər verir ki, bu barədə o, “Financial Times” nəşrinə müsahibəsində danışıb.
Bildirilib ki, Mark Ruttenin sözlərinə görə, Ukrayna münaqişə zamanı müəyyən uğurlar əldə edib və ABŞ Prezidenti Donald Tramp da Ağ Evdə keçirilən görüş zamanı bunu etiraf edib. Bununla belə, NATO-nun Baş katibi qeyd edib ki, bu uğurlar Rusiyanın sülh danışıqlarında güzəştə gedəcəyi anlamına gəlmir.
Məlumata görə, Rutte alyansın əsas məqsədinin Ukraynanın müdafiə qabiliyyətini maksimum dərəcədə gücləndirmək və onun mümkün sülh danışıqlarına ən əlverişli mövqedən qatılmasını təmin etmək olduğunu vurğulayıb.
Qeyd olunub ki, NATO rəhbəri yekun qərarın Rusiya Prezidenti Vladimir Putin tərəfindən veriləcəyini bildirib. Onun sözlərinə görə, Moskvanın danışıqlara hazır olub-olmaması hələ də qeyri-müəyyəndir.
Xatırladaq ki, bundan əvvəl “Boulevard Voltaire” nəşri NATO-nun qarşıdakı sammitinin gündəliyinə Avropa ilə Rusiya arasında birbaşa silahlı toqquşma ehtimalının daxil edilə biləcəyi barədə məlumat yayıb.
