OMM Redaksiyası
Fələstin prezidenti Mahmud Abbas gələn ay keçirilməsi planlaşdırılan parlament seçkilərini 2027-ci il sentyabrın 11-dək təxirə salıb. O, prezident seçkilərinin də həmin tarixdə keçirilməsi barədə qərar verib.
Fələstinin rəsmi WAFA agentliyinin məlumatına görə, Abbasın fərmanında “İsrailin tədbirlərinin yaratdığı maneələr” və “azad, ədalətli və inklüziv seçkilər” üçün uyğun siyasi, təhlükəsizlik və yer şəraitinin yaradılması zərurəti əsas gətirilib.
Fərmanda Qüds, İordan çayının qərb sahili və Qəzzada yaşayan fələstinlilər səsvermədə iştirak etməyə çağırılıb.
Fələstinlilər 2006-cı ildən parlament, 2005-ci ildən isə prezident seçkiləri keçirməyiblər. Abbas prezidentlik müddəti 2009-cu ildə başa çatandan bəri fərmanlarla idarəçilik edir.
İsrailin xarici işlər naziri Gideon Saar “X” sosial şəbəkəsində Abbasın açıqlamalarını tənqid edib. O, son Fələstin seçkilərinin təxminən 20 il əvvəl keçirildiyini vurğulayaraq deyilənləri məsuliyyətdən yayınmaq üçün “daha bir gülünc yalan” adlandırıb.
2006-cı il parlament seçkilərindən sonra HƏMAS ilə Abbasın “FƏTH” hərəkatına sadiq qüvvələr arasında toqquşmalar baş verib və HƏMAS 2007-ci ildə Qəzzaya nəzarəti ələ keçirib.
Qərar Fələstin fraksiyaları və siyasi qruplarla məsləhətləşmələrdən sonra qəbul edilib. Fərmanda Fələstin birliyinin gücləndirilməsi və seçki prosesinin qarşısındakı çətinliklərin həlli üçün hərtərəfli milli dialoqun vacibliyi də qeyd olunub.
Reuters-ə danışan iki Fələstin rəsmisi cümə axşamı bildirib ki, “FƏTH” və HƏMAS liderləri çərşənbə günü Qahirədə keçirilən görüşdə seçkilərin təxirə salınması barədə razılığa gəliblər.
Fələstin Siyasət və Sorğular Araşdırmaları Mərkəzinin avqustda keçirdiyi sorğu hər iki hərəkatın dəstəyinin azaldığını göstərib. Bir çox fələstinli Qəzza ilə İordan çayının qərb sahili arasındakı siyasi parçalanmada bu hərəkatları günahlandırır.
Abbas sentyabrın 24-də BMT Baş Assambleyasındakı çıxışında, beynəlxalq dəstək alan islahatları irəli aparmağa çalışdığı vaxt, seçkilərin noyabrda keçirilməsi planını bir daha təsdiqləmişdi.
O, 2025-ci ilin sentyabrında Fransanın Fələstin dövlətini tanıması çərçivəsində Fransa prezidenti Emmanuel Makrona və Səudiyyə Ərəbistanının vəliəhdi Məhəmməd bin Salmana prezident və parlament seçkiləri keçirməyə söz vermişdi.
Fransa Xarici İşlər Nazirliyi cümə axşamı seçkilərin keçirilməsinin vacib olduğunu bildirib və Avropa İttifaqının seçkiləri müşahidə missiyasının yaradılmasını alqışlayıb.
