OMM Redaksiyası
Mahir Məmmədov üçüncü dəfə Beynəlxalq Şahmat Federasiyasının (FIDE) vitse-prezidenti seçilib.
Azərbaycan Şahmat Federasiyasının prezidenti bu barədə Səmərqənddə keçirilən FIDE Konqresindən sonra açıqlama verib.
Mahir Məmmədov bildirib ki, yenidən vitse-prezident seçilməsi yalnız onun şəxsi uğuru deyil, bütövlükdə Azərbaycanın şahmat məktəbinə və dövlətin idmana göstərdiyi diqqətə verilən beynəlxalq qiymətdir. O, bu etimadı doğrultmağın böyük məsuliyyət olduğunu qeyd edib.
FIDE-də növbəti dörd il üçün hədəflər
FIDE-nin yeni seçilən prezidenti Timur Turlovla birlikdə qarşıdakı dörd il üçün bir sıra məqsədlərin müəyyənləşdirildiyini deyən Məmmədov şahmatın coğrafiyasını genişləndirməyin, müasir texnologiyalar və rəqəmsal platformalar vasitəsilə oyunu gənclər üçün daha əlçatan etməyin əsas prioritetlərdən olduğunu vurğulayıb.
Onun sözlərinə görə, məktəblərdə şahmatın tədrisi proqramları gücləndiriləcək, həmçinin qadınların peşəkar şahmatda və idarəçilikdə rolunun artırılmasına yönələn innovativ layihələr həyata keçiriləcək. Azərbaycan tərəfi ölkədə və dünya miqyasında şahmatın inkişafı istiqamətində fəaliyyətini davam etdirəcək.
