OMM Redaksiyası
Leyla Əliyeva Vətən Müharibəsi Qəhrəmanı, Dövlət Sərhəd Xidmətinin şəhid baş giziri Şahin Allahyarovun ailəsini ziyarət edib.
"Operativ Məlumat Mərkəzi-OMM" xəbər verir ki, əvvəlcə Leyla Əliyeva şəhidin xatirə guşəsi ilə tanış olub.
Daha sonra şəhidin anası Nərgiz Allahyarova ilə söhbət edib, onun oğlu haqqında xatirələrini dinləyib. Görüş zamanı şəhidin həyatının müxtəlif dövrlərini əks etdirən şəkillərə baxılıb, Vətən müharibəsi dövründə ailə üzvlərinə göndərdiyi videoçarx izlənilib.
N.Allahyarova şəhid ailələrinə göstərilən diqqət və qayğıdan məmnunluq ifadə edib. O, dövlətimizin başçısına və ailə üzvlərinə minnətdarlığını bildirərək, ölkəmizə sülh və əmin-amanlıq arzulayıb.
Leyla Əliyeva şəhidin ailə üzvlərinə hədiyyələr təqdim edib, onlarla xatirə şəkli çəkdirib.
Qeyd edək ki, Azərbaycan Ordusunun baş giziri Şahin Allahyarov 2020-ci ildə 44 günlük Vətən müharibəsində Füzulinin, Cəbrayılın və Şuşanın azadlığı uğrunda gedən döyüşlərdə savaşıb.
Qəhrəman hərbçi noyabrın 1-də Şuşa uğrunda döyüşlər zamanı şəhid olub və Quba rayonunda dəfn edilib.
Döyüşlər zamanı göstərdiyi igidliyə görə Prezident İlham Əliyevin Sərəncamına əsasən, Şahin Allahyarov ölümündən sonra "Vətən Müharibəsi Qəhrəmanı" adı ilə təltif olunub.
