Rusiya Federasiyasının xarici işlər naziri Sergey Lavrov Avropa ölkələrinin Ukrayna ilə bağlı irəli sürdüyü təşəbbüslərə münasibət bildirib.
"Operativ Məlumat Mərkəzi-OMM" xəbər verir ki, nazir bu barədə XII "Primakov oxuları" beynəlxalq elmi-ekspert forumunda çıxışı zamanı danışıb.
Məlumata görə, Lavrov Ukrayna ərazisinə beynəlxalq stabilizasiya qüvvələrinin yerləşdirilməsi ilə bağlı təklifləri tənqid edib. Onun sözlərinə görə, belə bir addım regionda uzunmüddətli gərginliyin yaranmasına və yeni geosiyasi ayrılıqların formalaşmasına səbəb ola bilər.
Bildirilib ki, Rusiya XİN rəhbəri Avropanın təhlükəsizlik zəmanətləri çərçivəsində irəli sürdüyü təşəbbüslərin Ukraynanın gələcəyi baxımından ciddi nəticələr doğura biləcəyini qeyd edib. Lavrovun fikrincə, xarici hərbi qüvvələrin yerləşdirilməsi ölkənin faktiki bölünməsinə gətirib çıxara və regionda yeni siyasi sədlərin yaranmasına zəmin hazırlaya bilər.
Qeyd olunub ki, nazir çıxışında bu ssenarini tarixi paralellərlə müqayisə edərək, Avropada yeni ayrıcı xətlərin formalaşması riskindən danışıb.
Məlumata əsasən, Sergey Lavrov vurğulayıb ki, rəsmi Moskva belə yanaşmanı qəbuledilməz hesab edir və bunun münaqişənin həllinə deyil, əksinə, daha dərin geosiyasi qarşıdurmalara səbəb ola biləcəyini düşünür.
Bildirilib ki, Rusiya tərəfi Ukrayna böhranının həlli istiqamətində diplomatik yolların və siyasi dialoqun üstün tutulmasının vacibliyini qeyd edir.
