Afət Ziyadqızı
Türkiyənin Antalya vilayətinin Karakaya məhəlləsində baş verən faciəvi hadisə ilə bağlı axtarış-xilasetmə işləri davam etdirilir.
"Operativ Məlumat Mərkəzi-OMM" xəbər verir ki, iyunun 12-də dostları ilə birlikdə istirahət edərkən sərinləmək məqsədilə Alara Çayına daxil olan Əhməd Polatın itkin düşməsi ilə bağlı aparılan axtarışlar artıq 13 gündür davam edir.
Məlumata görə, Manavgat Respublika Prokurorluğunun nəzarəti altında keçirilən əməliyyatlara çoxsaylı dövlət qurumları və könüllü təşkilatlar cəlb olunub.
Bildirilib ki, axtarış işlərinə ümumilikdə 78 nəfərlik heyət qatılıb. Əməliyyatlarda Jandarma asayiş və komando bölmələri, sualtı xilasetmə qrupları, xüsusi təlim keçmiş axtarış itləri, polis dalğıcları, həmçinin AFAD, İHH və UMKE əməkdaşları iştirak edir.
Qeyd olunub ki, axtarışlar Karakaya məhəlləsində yerləşən DSİ bəndi ilə Odaönü məhəlləsindəki Ulugüney nasos stansiyası arasında qalan təxminən 3 kilometrlik çay yatağını və ətraf gölet sahələrini əhatə edir.
Məlumata əsasən, Dövlət Su İşləri (DSİ) əməkdaşları çayda su axınının sürətini azaltmaq məqsədilə ağır texnika vasitəsilə yatağa qum və çınqıl tökərək müəyyən tənzimləmə işləri həyata keçiriblər.
Bildirilib ki, görülən bütün tədbirlərə baxmayaraq, hazırkı mərhələdə itkin düşən şəxsin tapılması istiqamətində nəticə əldə olunmayıb və axtarış-xilasetmə əməliyyatları davam etdirilir.
