Rusiya Ukraynanın müdafiə naziri postuna kimin təyin olunacağı ilə bağlı mövqeyini açıqlayıb.
“Operativ Məlumat Mərkəzi-OMM” xəbər verir ki, Kremlin mətbuat katibi Dmitri Peskov jurnalistlərə açıqlamasında Moskva üçün Ukraynanın müdafiə naziri vəzifəsində kimin çalışmasının xüsusi əhəmiyyət daşımadığını bildirib.
Peskov qeyd edib ki, Rusiya Ukraynada baş verən prosesləri diqqətlə izləyir. Onun sözlərinə görə, Moskva üçün əsas məsələ Kiyev rəhbərliyində məsuliyyət daşıyan və münaqişənin dinc yolla həllinə, yaxud hərbi əməliyyatların başa çatdırılmasına yönəlmiş qərarlar qəbul edə biləcək şəxslərin olmasıdır.
Qeyd edək ki, Ukraynada son günlər hökumət daxilində mühüm kadr dəyişiklikləri baş verir. Prezident Vladimir Zelenski Nazirlər Kabinetinin yenilənməsi ilə bağlı planlarını açıqlayıb.
Parlamentin qərarı ilə Baş nazir Yuliya Sviridenko vəzifəsindən azad edilib və bu, hökumətin istefasına səbəb olub. Zelenski yeni Baş nazir postuna "Naftoqaz" rəhbəri Sergey Koreckinin namizədliyini irəli sürüb.
Bununla yanaşı, Ukrayna parlamentinin deputatı Yaroslav Jeleznyak müdafiə naziri vəzifəsinə hazırkı daxili işlər naziri İqor Klimenkonun gətirilə biləcəyini bildirib. İddialara görə, Zelenski hazırkı müdafiə nazirini hərbi komissarlıqlarda aparılan islahatların uğursuzluğu ilə bağlı tənqid edib.
Bu dəyişikliklər fonunda Ukraynanın müxtəlif şəhərlərində kütləvi etiraz aksiyalarının keçirildiyi bildirilir.
