OMM Redaksiyası
Rusiya hökuməti insan ömrünün uzadılması və yaşlanma prosesinin ləngidilməsi məqsədilə yeni strateji təşəbbüsə start verib. Qərb mətbuatına istinadən yayılan məlumatlara görə, Kreml "New Health Preservation Technologies" adlı təxminən 26 milyard dollarlıq proqramı dövlət üçün prioritet istiqamət kimi müəyyən edib.
Layihə çərçivəsində biotexnologiya, gen terapiyası, toxuma mühəndisliyi və süni orqanların istehsalı kimi sahələrə böyük investisiyalar yatırılır. Rusiya elmi institutlarında aparılan tədqiqatlar əsasən iki istiqamət üzərində cəmlənib:
- 3D biyobaskı: Toxuma və orqanların süni üsullarla çap edilməsi.
- Ksenotransplantasiya: Genetik modifikasiya edilmiş heyvanlar, xüsusilə "mini donuzlar" vasitəsilə insan orqanlarının yetişdirilməsi.
Mütəxəssislər hesab edirlər ki, bu texnologiyalar gələcəkdə orqan köçürülməsi üçün növbədə dayanan xəstələrin problemini həll edə bilər. Hətta 2030-cu ilə qədər laboratoriya şəraitində insan orqanlarının istehsalının mümkün olacağı proqnozlaşdırılır. Bununla yanaşı, "Kurchatov İnstitutu"nun rəhbəri Mixail Kovalçuk insan bədəninin gələcəkdə daim bərpa oluna bilən bir struktura çevrilməsi perspektivindən bəhs edib.
Qeyd edək ki, beynəlxalq elmi ictimaiyyət proqramın elmi əsaslarına dair şübhələrini ifadə edir. Bir çox ekspertlər Kremlin hesabatlarının elmi sübutlardan daha çox siyasi gözləntilərə söykəndiyini və beynəlxalq səviyyədə təsdiqlənmədiyini vurğulayırlar. Analitiklər bu layihəni həm Rusiyanın demoqrafik problemlərinin həlli, həm də Vladimir Putinin uzunömürlülük sahəsində qlobal liderlik ambisiyaları ilə əlaqələndirirlər.
