"Tottenhem"in baş məşqçisi Angelos Postekoqlu Harri Keynin "Bavariya"ya getməsindən sonra London klubunun daha yaxşı oynaması ilə bağlı verilən sualı istehza ilə cavablandırıb.
"Operativ Məlumat Mərkəzi-OMM" xəbər verir ki, avstraliyalı məşqçi ingilis forvardın gedişindən sonra komandanın necə oynaması haqda da danışıb:
"Harrisiz daha yaxşı oynadığımız fikri ilə razı deyiləm. Çünki o, bizim üçün oynadığı son görüşdə dörd qol vurmuşdu. Düşünürəm ki, komandada qalsaydı, ona əsas heyətdə yer tapardıq. Amma onun yoxluğu bizə dinamikanı dəyişən fərqli oyunçuları komandaya cəlb etməyə imkan verir. Komandalarımın aydın bir quruluşla oynamasını istəsəm də, hər kəsin oyunun dinamikasını dəyişə biləcəyi balanslaşdırılmış bir heyətə sahib olmağa çalışıram. Harrinin komandada olmaması bizi komanda olaraq dəyişir, çünki biz başqa oyunçulara güvənirik, lakin o, burada olsaydı, struktur eyni qalacaq və rəqib üzərində dominantlıq, təzyiq göstərmək üçün eyni əsaslara sahib olardıq”.
