Kleberson: “Mançester Yunayted”də Kriştiano Ronaldunu Luis Fiqu ilə müqayisə edirdik

Braziliyalı futbolçu Kleberson “Mançester Yunayted”də çıxış etdiyi dövrdə Kriştiano Ronaldunun necə ələ salındığını danışıb.

Kleberson və Kriştiano Ronaldu 2003-2005-ci illərdə İngiltərə klubunda komanda yoldaşı olublar. Braziliyalı futbolçu bildirib ki, komanda yoldaşları portuqaliyalı hücumçunu Luis Fiqu ilə müqayisə edərək zarafatla təngə gətirirdilər.

“Bu, gülməli hekayədir. Soyunub-geyinmə otağında Djembe-Djembe, Rio Ferdinand və digər futbolçularla yanaşı oturmuşduq. Kriştiano Ronaldo, Ronaldinyo və başqa ulduzlar haqqında danışırdı. Sonra dedi: «Bir gün Fiqudan daha yaxşı olacağam!»” – Kleberson “Sovetski Sport”a müsahibəsində deyib.

Onun sözlərinə görə, komanda yoldaşları Ronaldoya “Sən zarafat edirsən, heç vaxt Fiqudan yaxşı ola bilməyəcəksən” deyərək cavab veriblər. “Amma o, bunu bacardı. Ronaldu möhtəşəm karyera qurdu. Fərqli dövrlərin futbolçularını müqayisə etmək mənim üçün çətindir. Mən Dieqo Maradonanın oyununu izləyərək böyümüşəm, daha sonra Lionel Messini görmüşəm. Fiqu öz dövrünün Portuqaliyasında görkəmli futbolçu idi, sonra isə Kriştiano, Rikardo Kuarejma və Nani meydana çıxdı. İdmanda həmişə yeni biri gəlir”, – Kleberson əlavə edib.

Qeyd edək ki, Kleberson sentyabrın 26-da Moskvada MOİK-in sabiq hücumçusu Vaqner Lavın vida matçında iştirak edib.