OMM Redaksiyası
Macarıstan çempionatının 10-cu turunda “Kişvarda” ilə “Ferentsvaroş” arasında keçirilən oyun 1:1 hesabı ilə başa çatıb. Qarşılaşma “Varkert” stadionunda baş tutub.
Meydan sahibləri 3-cü dəqiqədə penalti qazanıblar. Qonaqların gənc qapıçısı Daniel Radnoti cərimə meydançasında Kristian Hertsi qayda pozuntusu ilə dayandırıb. Lakin Soma Novotni 11 metrlik cərimə zərbəsini dəqiq yerinə yetirə bilməyib və top dirəyə dəyib.
“Kişvarda” 33-cü dəqiqədə hesabı açıb. Ukraynalı yarımmüdafiəçi Boqdan Melnik Habib Mayqadan aldığı topu təxminən 30 metrdən zərbə ilə qapının aşağı küncünə göndərib.
Qoldan sonra hücumlarını artıran “Ferentsvaroş” 39-cu dəqiqədə bir neçə təhlükəli vəziyyət yaradıb. “Kişvarda”nın qapıçısı İlya Popoviç və müdafiəçilər hesabın dəyişməsinə imkan verməyiblər. Epizodlardan birində Mayqanın baş zərbəsindən sonra top dirəyə dəyib.
İkinci hissədə hesab bərabərləşdi
Fasilədən sonra hücumda üstünlük qonaqlara keçib. “Ferentsvaroş” rəqib müdafiəsini uzun müddət yara bilməsə də, 75-ci dəqiqədə Kallum O'Dauda hesabı 1:1 edib.
Matçın sonlarında “Kişvarda” yenidən önə keçməyə çalışıb. Amos Yuqunun baş zərbəsindən sonra top qapıdan yan keçib.
Anatoli Nuriyev qarşılaşmada iştirak etməyib. Macarıstan Futbol Federasiyasının rəsmi protokolunda onun adı nə “Kişvarda”nın start heyətində, nə də ehtiyat oyunçular siyahısında yer alıb. Futbolçunun iştirak ərizəsinə salınmamasının səbəbi açıqlanmayıb.
10 oyundan sonra 11 xal toplayan “Kişvarda” turnir cədvəlində 9-cu yerdədir. Doqquz qarşılaşmada 14 xal qazanan “Ferentsvaroş” isə 6-cı pillədə qərarlaşıb.
