Böyük Britaniyanın Baş naziri Kir Starmer Rusiya freqatının İngilis Kanalında Britaniya bayrağı altında üzən yaxtaya xəbərdarlıq atəşi açması ilə bağlı hadisəni tənqid edib.
"Operativ Məlumat Mərkəzi-OMM" xəbər verir ki, bu barədə BBC məlumat yayıb.
Məlumata görə, Starmer iyunun 17-də Fransada keçirilən G7 sammiti çərçivəsində jurnalistlərə açıqlamasında hadisəni “dərin narahatlıq doğuran” adlandırıb.
“Bu baş verməməli idi. Bu, ehtiyatsızlıq idi və yaxtadakı cütlük qorxmuş olmalı idi”, - deyə Baş nazir bildirib.
Hadisə zamanı “Bright Future” adlı Britaniya yaxtasında əri Alan ilə beynəlxalq sularda üzən Ceyn Kelvin bildirib ki, iki gəmi arasında heç bir toqquşma təhlükəsi olmayıb.
Onun sözlərinə görə, Rusiya hərbi gəmisi əvvəlcə beş dəfə atəş açıb, daha sonra istiqamətini dəyişərək yenidən atəş açıb. Kelvin qeyd edib ki, ümumilikdə baş verənlər fonunda bu addımlar tamamilə lazımsız olub.
Britaniya Müdafiə Nazirliyinin nümayəndəsi isə bildirib ki, atəşlər yaxtaya qarşı yönəlməyib və mümkün toqquşmanın qarşısını almaq məqsədi daşıyıb. Nazirlik hadisənin araşdırıldığını və ilkin olaraq bunun təcrid olunmuş bir insident kimi qiymətləndirildiyini açıqlayıb.
Rusiya Müdafiə Nazirliyi daha əvvəl bildirib ki, iyunun 16-da saat 12:45-də “Admiral Qriqoroviç” freqatının heyəti İngilis Kanalında Britaniyanın mülki “Bright Future” yaxtasına qabaqlayıcı atəş açıb.
Rusiya tərəfinin məlumatına görə, yaxta xəbərdarlıq siqnallarına cavab verməyib və hərbi gəmiyə təhlükəli məsafədə yaxınlaşıb.
