İsrailin müdafiə naziri İsrael Katz ölkəsinin Livanın cənubundakı təhlükəsizlik zonasını tərk etməyəcəyini bəyan edib.
"Operativ Məlumat Mərkəzi-OMM" xəbər verir ki, nazir bu barədə verdiyi açıqlamada İsrailin bölgədəki təhlükəsizlik siyasətinin dəyişməz qaldığını bildirib.
Məlumata görə, Katz Livanın cənubunda yaradılmış təhlükəsizlik zonasının İsrailin milli təhlükəsizliyi baxımından mühüm əhəmiyyət daşıdığını vurğulayıb. O qeyd edib ki, ölkəsi xarici tərəflərin mümkün çağırışlarından asılı olmayaraq, mövcud təhlükəsizlik tədbirlərini davam etdirmək niyyətindədir.
Bildirilib ki, İsrail rəsmisi bölgədə mülki əhalinin geri qayıdışı və təhlükəsizlik riskləri ilə bağlı narahatlıqlarını da dilə gətirib. Onun sözlərinə görə, keçmişdə təhlükəsizlik zonalarında İsrail hərbçilərinə qarşı müxtəlif hücumlar həyata keçirilib və bu cür hadisələrin təkrarlanmasına imkan verilməyəcək.
Qeyd olunub ki, İsrailin Baş naziri Binyamin Netanyahu da Livanın cənubundakı vəziyyətlə bağlı mövqeyini açıqlayaraq, İsrail Müdafiə Ordusunun (SAXAL) təhlükələrin qarşısını almaq üçün bölgədə fəaliyyət göstərməyə davam edəcəyini bildirib.
Məlumata əsasən, daha əvvəl beynəlxalq mediada İsrail və Hizbullah arasında atəşkəs razılaşmasının əldə olunduğu barədə xəbərlər yayılmışdı. Lakin sonrakı günlərdə tərəflər arasında qarşılıqlı hücumların davam etdiyi bildirilib.
Bildirilib ki, regionda vəziyyət gərgin olaraq qalır və tərəflər arasında əldə olunan razılaşmaların icrası ilə bağlı müzakirələr davam etdirilir.
