Aprelin 29-da Baş prokuror ölkəmizdə səfərdə olan Türkiyə İnsan Hüquqları və Bərabərlik Qurumunun sədri Muharrem Kılıçın rəhbərlik etdiyi nümayəndə heyəti ilə görüşüb.

Baş Prokurorluqdan "Operativ Məlumat Mərkəzi-OMM"-ə verilən xəbərə görə, Kamran Əliyev qonağı salamlayaraq, ölkələrimiz arasında dostluq və qardaşlıq münasibətlərinin inkişafının dövlət başçıları İlham Əliyev və Rəcəb Tayyib Ərdoğanın birgə səyləri nəticəsində ən yüksək müttəfiqlik səviyyəsinə yüksəldiyini qeyd edib.

Baş prokuror Müzəffər Ali Baş Komandan İlham Əliyevin rəhbərliyi altında 44 günlük Vətən müharibəsi və ondan sonrakı proseslərdə Türkiyə dövlətinin və xalqının siyasi və mənəvi dəstəyinə görə təşəkkürünü ifadə edib. Kamran Əliyev ölkə rəhbərliyinin diqqət və qayğısı nəticəsində işğal dövründə ermənilərin xalqımızın tarixi, dini və mədəni abidələrinə qarşı törətdikləri vəhşiliklərin və onların fəsadlarının aradan qaldırılması istiqamətində Qarabağda aparılan sürətli quruculuq-bərpa işləri barədə qonağa məlumat verib.

Kamran Əliyev qonaqlara ölkəmizdə həyata keçirilən hüquq islahatları çərçivəsində prokurorluq orqanlarının fəaliyyətinin müasirləşdirilməsi istiqamətində aparılan köklü islahatlar barədə məlumat verib.

Səmimi qəbula görə öz təşəkkürünü bildirən Muharrem Kılıç ölkələrimiz arasında hüquqi sahədə əlaqələrin yüksək səviyyədə inkişaf etməsi və səmərəli əməkdaşlığın həyata keçirildiyi bildirib.

Görüş zamanı tərəflər insan hüquq və azadlıqlarının müdafiəsi ilə bağlı mühüm əhəmiyyət kəsb edən məsələləri müzakirə edərək, birgə əməkdaşlıq istiqamətləri barədə fikir mübadiləsi aparıblar.

Mayın 16-da Azərbaycan Respublikasının Prezidenti İlham Əliyevin Belarus Respublikasının Prezidenti Aleksandr Lukaşenko ilə təkbətək görüşü başlayıb.

"Operativ Məlumat Mərkəzi-OMM"-in xəbərinə görə, bu barədə Prezidentin Mətbuat Xidməti məlumat yayıb.

Azərbaycana dövlət səfərinə gələn Belarus Respublikasının Prezidenti Aleksandr Lukaşenkonun mayın 16-da rəsmi qarşılanma mərasimi olub.

"Operativ Məlumat Mərkəzi-OMM" xəbər verir ki, hər iki ölkənin Dövlət bayraqlarının dalğalandığı meydanda Belarus Prezidentinin şərəfinə fəxri qarovul dəstəsi düzülmüşdü.

Azərbaycan Prezidenti İlham Əliyev Belarus Prezidenti Aleksandr Lukaşenkonu qarşıladı.

Fəxri qarovul dəstəsinin rəisi Belarus Prezidentinə raport verdi.

Belarus Respublikasının və Azərbaycan Respublikasının Dövlət himnləri səsləndirildi.

Azərbaycan nümayəndə heyəti Belarus Prezidentinə, Belarus nümayəndə heyəti isə Azərbaycan Prezidentinə təqdim olundu.

Fəxri qarovul dəstəsi hərbi marşın sədaları altında Azərbaycan Prezidenti İlham Əliyevin və Belarus Prezidenti Aleksandr Lukaşenkonun qarşısından keçdi.

Dövlət başçıları rəsmi foto çəkdirdilər.

Belarus Prezidenti Aleksandr Lukaşenko Azərbaycana dövlət səfərinə gəlib.

"Operativ Məlumat Mərkəzi-OMM" BELTA-ya istinadən xəbər verir ki, dövlət başçısının təyyarəsi Heydər Əliyev Beynəlxalq Aeroportuna eniş edib.

Aleksandr Lukaşenkonu Azərbaycan baş nazirinin birinci müavini Yaqub Eyubov, xarici işlər nazirinin müavini Elnur Məmmədov, Azərbaycanın Belarusdakı fövqəladə və səlahiyyətli səfiri Məhərrəm Əliyev, o cümlədən Belarus nümayəndə heyətinin üzvləri - Baş nazirin müavini İqor Petrişenko, xarici işlər naziri Sergey Aleynik və Belarus diplomatik missiyasının rəhbəri Andrey Ravkov qarşılayıblar.

Azərbaycanın İnsan Hüquqları üzrə Müvəkkili (Ombudsman) Səbinə Əliyeva Rusiya Federasiyasının Tatarıstan Respublikasında “Rusiya-İslam dünyası: KazanForum” 2024 XV Beynəlxalq İqtisadi Forumunda iştirak edib.

Bu barədə "Operativ Məlumat Mərkəzi-OMM"-ə Ombudsman Aparatından məlumat verilib.

Bildirilib ki, Forumda “Azərbaycan Respublikasında qadınların səlahiyyətlərinin artırılması” mövzusunda çıxışı zamanı Müvəkkil Azərbaycanda qadınların cəmiyyətdəki rolundan, onların ölkənin ictimai-siyasi həyatında iştirakının əhəmiyyətindən bəhs edib.

Qadınların hüquqlarının müdafiəsi və gender bərabərliyinin təmin edilməsində ombudsman və milli insan hüquqları təsisatlarının mühüm rol oynadığını qeyd edən S.Əliyeva müvafiq sahədə həyata keçirdiyi fəaliyyəti barədə məlumat verib, Aparat tərəfindən qadınlar arasında hüquq mədəniyyətinin inkişaf etdirilməsi istiqamətində hüquqi maarifləndirmə tədbirlərinin həyata keçirildiyini qeyd edib. Eləcə də təsisat tərəfindən “Genderə giriş” mühazirələr toplusunun, çap vasitələrinin və müvafiq mövzuda məqalələrin hazırlandığı bildirilib.

Eyni zamanda, Ombudsman tərəfindən mövcud qanunvericilik aktlarına əlavə və dəyişikliklərin edilməsi, eləcə də yeni qanun layihələrinin qəbul olunması ilə bağlı tövsiyələrin hazırlandığı diqqətə çatdırılıb.

Müvəkkil ölkəmizdə qadınların hüquq və azadlıqlarının təmini məsələlərinə, gender bərabərliyinə nail olunmasına xüsusi diqqət yetirildiyini söyləyib, qadın hüquqlarının müdafiəsi baxımından milli qanunvericilikdə mühüm əhəmiyyətə malik islahatların həyata keçirildiyini qeyd edib.

Ombudsman qadınların ölkə həyatının bütün sahələrinə fəal cəlb olunması istiqamətində həyata keçirilən tədbirlər nəticəsində gender siyasətinin inkişafında irəliləyişlərin əldə olunduğunu bildirib.

Müvəkkil qadınların təhsil almaq hüququnun təmini, qadın sahibkarlığının inkişaf etdirilməsi istiqamətində əldə edilmiş müsbət təcrübələri tədbir iştirakçılarının diqqətinə çatdırıb.

Səfər çərçivəsində Ombudsman Səbinə Əliyeva Tatarıstan Respublikası Dövlət Şurasının “Mərhəmət” qadın deputatları assosiasiyasının rəhbəri Alsu Nəbiyeva və bir qrup qadın deputatla görüşüb.

Görüş zamanı Müvəkkil insan hüquq və azadlıqlarının müdafiəsi istiqamətində həyata keçirdiyi fəaliyyətindən danışıb, beynəlxalq əməkdaşlığa mühüm əhəmiyyət verildiyini, o cümlədən xarici ölkələrin ombudsman və milli insan hüquqları təsisatları ilə sıx əlaqələrin mövcud olduğunu qeyd edib.

Tatarıstanın Ombudsmanı ilə əməkdaşlıq əlaqələrindən bəhs edən S.Əliyeva təsisatlar arasındakı mövcud münasibətləri yüksək qiymətləndirib. Görüşdə, həmçinin insan hüquq və azadlıqlarının təmini və bir sıra digər istiqamətlərdə gələcək əməkdaşlıq perspektivləri müzakirə olunub.

Daha sonra Ombudsman “Tatarıstan Respublikasının Azərbaycan Milli-Mədəniyyəti Muxtariyyəti” regional ictimai təşkilatında görüş keçirib. Görüş zamanı Müvəkkilə təşkilatın fəaliyyət istiqamətləri barədə məlumat verilib, müxtəlif xalqların ənənələrinin, dillərinin qorunub saxlanılması üçün tədbirlərin görüldüyü diqqətə çatdırılıb, məktəblilər üçün “Dostluq dərsləri”nin tədris olunduğu qeyd edilib, eyni zamanda, qarşılıqlı maraq doğuran məsələlər barədə fikir mübadiləsi aparılıb.

Mayın 15-də Portuqaliyanın Lissabon şəhərində Kral Abdullah bin Əbdüləziz Beynəlxalq Dinlərarası və Mədəniyyətlərarası Dialoq Mərkəzinin (KAICIID) Lissabon şəhərində təşkil etdiyi Qlobal Dialoq Forumu öz işinə başlayıb.

"Operativ Məlumat Mərkəzi-OMM" xəbər verir ki, Azərbaycan Prezidenti İlham Əliyevin Qlobal Dialoq Forumunun iştirakçılarına ünvanlanmış məktubunu Dini Qurumlarla İş üzrə Dövlət Komitəsinin sədri Ramin Məmmədov oxuyub.

Prezident İlham Əliyevin məktubunda qeyd olunub ki, fərqli sivilizasiyaların qovşağında yerləşən Azərbaycanda heç vaxt etnik-dini zəmində ayrı-seçkilik və qarşıdurma baş verməmiş, tarixən qarşılıqlı etimada və hörmətə əsaslanan mütərəqqi milli-mədəni və dini münasibətlər mövcud olmuşdur.

“Tolerantlıq və multikultural dəyərlər Azərbaycan cəmiyyətinin demokratik birgəyaşayış normasıdır. Bakıda keçirilən ənənəvi Ümumdünya Mədəniyyətlərarası Dialoq Forumu, Beynəlxalq Humanitar Forum, Dünya Dini Liderlərinin Sammiti kimi nüfuzlu tədbirlər mədəniyyətlərarası münasibətlərin inkişafında mühüm rol oynayır. Biz inanırıq ki, etnik-mədəni müxtəliflik ayırıcı xətt deyil, əksinə, xalqlar arasında ahəngdar inkişafa xidmət edən unikal sərvətdir”, - dövlət başçısının məktubunda qeyd olunub.

Azərbaycan Prezidentinin məktubunda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində nəzərdə tutulmuş dünya dini liderlərinin zirvə görüşünün qlobal iqlim dəyişmələri problemlərinin həllində siyasət və din xadimlərinin həmrəyliyinin vacibliyini bir daha təsdiq edəcəyinə əminlik ifadə olunub.

KAICIID Direktorlar Şurasının üzvü, Qafqaz Müsəlmanları İdarəsinin sədri, Şeyxülislam Allahşükür Paşazadə Forumda çıxış edib.

“Transformativ dialoq: Sürətlə dəyişən dünyada sülh naminə alyansların qurulması” mövzusuna həsr edilmiş Forumda münaqişələrin nəticəsi olaraq yaranmış böhranlar zamanı gərginliyin qarşısını almaq, postmünaqişə dövründə dialoq və etimad quruculuğu istiqamətində tədbirlərə dəstək məqsədilə dini liderlərin və qurumların öz ənənələrinə əsaslanaraq verə biləcəyi töhfələrlə bağlı müzakirələr aparılır.

Tədbirdə dünyada urbanizasiyanın artması ilə əlaqədar dini və etnik azlıqların təcrid edilməsi ilə bağlı narahatedici tendensiyalarla əlaqədar fikir mübadiləsi də aparılır. Eyni zamanda, tədbirin gündəliyinə təbii resursların mühafizəsi və iqlim dəyişikliyi problemlərinin həllində dini və dünyəvi tərəfdaşlığın roluna dair müzakirələr daxil edilib.

Qeyd edək ki, KAICIID dünyanın bütün əsas dinlərinin nümayəndələri tərəfindən idarə olunan yeganə hökumətlərarası təşkilatdır. Təşkilatın missiyası müxtəlif dinlərə və mədəniyyətlərə malik insanlar arasında sülh, tolerantlıq və anlaşmanı təşviq etməkdir. Qlobal Dialoq Forumunun məqsədi BMT-nin 2030-cu il Gündəliyində təsbit edilən ümumi məqsədlərə doğru transformativ dialoq proseslərinin qurulması üçün yol xəritəsi haqqında qərar qəbul etməkdir.