Afət Ziyadqızı
İsrail XİN rəhbəri Hizbullahı Livanla sülhün əsas maneəsi adlandırıb
“Operativ Məlumat Mərkəzi-OMM” xəbər verir ki, bu barədə İsrailin xarici işlər naziri Gideon Saar açıqlama verib.
Bildirilib ki, Saar İsrailin Müstəqillik Günü münasibətilə Prezident Sarayında keçirilən diplomatik qəbul zamanı Livanla münasibətlər və bölgədəki vəziyyətlə bağlı danışıb.
Nazir qeyd edib ki, İsrail 40 ildən çoxdur Livanla birbaşa diplomatik əlaqə saxlamasa da, hazırda bu istiqamətdə tarixi bir addım ataraq birbaşa danışıqların bərpasına hazırdır.
O əlavə edib ki, Livan hazırda ciddi dövlət böhranı yaşayır və Hizbullah ölkə daxilində əsas təsir gücünə malikdir.
“Livan uğursuz dövlətdir və Hizbullah vasitəsilə faktiki olaraq İranın təsiri altındadır”, – deyə Saar bildirib.
Onun sözlərinə görə, İsrail və Livan arasında fundamental sərhəd mübahisələri çox deyil və mövcud məsələlər diplomatik yolla həll oluna bilər.
Saar vurğulayıb ki, sülh və normallaşma prosesinin qarşısında əsas maneə Hizbullahdır.
Qeyd olunub ki, İsrail və Livan arasında birbaşa danışıqların Vaşinqtonda bərpası planlaşdırılır.
