İsrail pilotsuz uçan aparatları (PUA) qüvvədə olan atəşkəs rejiminə baxmayaraq Qəzza zolağında bir neçə məhəlləni hədəfə alıb.
"Operativ Məlumat Mərkəzi-OMM" xəbər verir ki, bu barədə məlumatı Qətərin “Əl-Cəzirə” kanalı yayıb.
Bildirilib ki, hücumlar Qəzza şəhərinin şərqində yerləşən Əl-Şucaiyyə məhəlləsinə, eləcə də şimal zolağındakı Beyt Lahiyyə yaxınlığında yerləşən Əl-Atatra ərazisinə təşkil olunub. Nəticədə bir uşaq da daxil olmaqla iki fələstinlinin həyatını itirdiyi qeyd olunur.
Xatırladaq ki, oktyabrın 6-da İsrail və HƏMAS nümayəndə heyətləri Misir, Qətər, ABŞ və Türkiyənin vasitəçiliyi ilə Qəzza münaqişəsinin həlli üzrə yaxınlaşma danışıqlarını bərpa edib. Oktyabrın 9-da tərəflər ABŞ Prezidenti Donald Tramp tərəfindən təqdim olunan sülh planının birinci mərhələsini dəstəkləyib. Atəşkəsin uzadılması barədə razılaşma oktyabrın 10-da qüvvəyə minib.
