“Hizbullah” silahlı milislərinin pilotsuz uçuş aparatı (PUA) Aralıq dənizi üzərində İsrail Hərbi Dəniz Qüvvələrinə məxsus gəminin atdığı raketlə vurulub.

"Operativ Məlumat Mərkəzi-OMM"  TASS-a istinadən xəbər verir ki, bu barədə “Əl-Cəzirə” telekanalı məlumat yayıb.

Məlumata görə, PUA İsrailin eksklüziv iqtisadi zonasının üstündəki hava məkanına daxil olub və dənizdəki “Kariş” yatağının ərazisindəki qaz platformasına doğru irəliləyib.

Telekanal qeyd edir ki, vurulan PUA kəşfiyyat xarakterli olub və hədəfi vurmaq üçün istifadə edilməyib.

Xatırladaq ki, iyulun 24-də “Hizbullah”çılar Livan-İsrail sərhədindən 46 km aralıda yerləşən Ramat David aviabazasını havadan tədqiq etmək üçün İran istehsalı olan “Hudhud” kəşfiyyat PUA-sını havaya qaldırmışdı. Daha sonra strateji obyektin videoçəkilişi teleqram kanalında yerləşdirilib. “Hizbullah”çılar aviabazanın PUA üçün yer hədəfləri bankına daxil edildiyini açıqlamışdı.

ABŞ ordusu hipersəs silahlarının növbəti sınağını keçirməyə hazırlaşır.

"Operativ Məlumat Mərkəzi-OMM" xəbər verir ki, Pentaqonun məlumatına görə, uzaqmənzilli hipersəs silahlarının yeni sınağını 2024-cü ilin sonuna qədər keçirmək planlaşdırılır. Söhbət ABŞ ordusunu və Hərbi Dəniz Qüvvələrini təchiz etmək üçün hazırlanan “Dark Eagle” raket sistemindən (LRHW) gedir.

“Dark Eagle” hipersəs raketi saatda təxminən 6 min kilometr sürətlə uçmağa qadirdir. O, hündürlükdə manevr edə bilir ki, bu da raketdən müdafiə sistemlərinin raketi aşkarlamasını çətinləşdirir.

Raketin layihə uzaqlığının 2775 kilometr olduğu bildirilir.

Ukrayna Prezidenti Vladimir Zelenski İtaliyanın Baş naziri Ciorcia Meloni ilə görüşüb.

"Operativ Məlumat Mərkəzi-OMM" xəbər verir ki, bu barədə Zelenski “X” platformasındakı paylaşımında bildirib

Qeyd edək ki, müzakirə edilən mövzularda biri Ukraynanın bərpası və yenidən qurulması, xüsusilə enerji sistemlərinin bərpasına diqqət yetirmək olub.

“Biz İtaliyanın 2025-ci ildə növbəti Ukraynanın Bərpa Konfransına ev sahibliyi etmək qərarını təqdir edirik”,-deyə o qeyd edib.

Əlcəzairdə növbədənkənar prezident seçkiləri üzrə səsvermə başlayıb.

"Operativ Məlumat Mərkəzi-OMM" xəbər verir ki, bu barədə Əlcəzair milli radiosu məlumat yayıb.

Ölkə prezidenti postu üçün üç namizəd mübarizə aparır: “Sosialist Qüvvələr Cəbhəsi”ndən Yusef Auşiş, “Sülh uğrunda cəmiyyət hərəkatı” partiyasından Abdelali Həsəni Şərif və hazırkı Prezident Əbdülməcid Tebbun.

Dövlət başçısı ümumi səsvermə yolu ilə seçilir. Namizəd qalib gəlmək üçün 50 %-dən çox səs toplamalıdır. Namizədlərdən heç biri bu göstəricini aşa bilməsə, iki həftə sonra birinci turda ən çox səs toplayan iki namizəd arasında ikinci tur keçirilir. Qalib 5 il müddətinə prezident mandatı alacaq.

Çinin cənubundakı Hainan adasında güclü qasırğa iki nəfərin ölümünə və ən azı 92 nəfərin yaralanmasına səbəb olub.

"Operativ Məlumat Mərkəzi-OMM" xəbər verir ki, bu barədə “Xinhua“ məlumat yayıb. 

Tayfun 800 mindən çox evin elektrik enerjisi kəsilməsinə səbəb olub.

Qeyd edək ki, "Yagi" tayfunu son on ildə regionda ən güclü tayfunlardan biri kimi təsvir edilir.

ABŞ-ın İndiana ştatının Anderson şəhəri yaxınlığında tək mühərrikli təyyarənin qəzaya uğraması nəticəsində 4 nəfər həlak olub.

"Operativ Məlumat Mərkəzi-OMM" xəbər verir ki, bu barədə “Newsweek” portalı yerli şerif departamentinə istinadən məlumat yayıb.

Qeyd olunub ki, təyyarə cümə günü təxminən saat 06:45-də (Bakı vaxtı ilə 15:45) Fort-Dodc (Ayova ştatı) hava limanından havaya qalxıb və saat 10:00 (Bakı vaxtı ilə 19:00) radələrində Anderson hava limanına enməli idi.

Vurğulanıb ki, təyyarə qarğıdalı sahəsinə düşüb. Daha sonra ABŞ Federal Aviasiya Administrasiyası təyyarədə 4 nəfərin olduğunu və heç kimin sağ qalmadığını təsdiqləyib.