İran Xarici İşlər Nazirliyi ABŞ tərəfindən tətbiq olunan sanksiyaları kəskin şəkildə tənqid edib.
“Operativ Məlumat Mərkəzi – OMM” xəbər verir ki, rəsmi Tehran Vaşinqtonun birtərəfli qaydada həyata keçirdiyi məhdudlaşdırıcı tədbirlərin Birləşmiş Millətlər Təşkilatının (BMT) Nizamnaməsinin prinsipləri ilə uyğun gəlmədiyini bildirib.
İran Xarici İşlər Nazirliyinin açıqlamasında qeyd olunub ki, bu cür sanksiyalar beynəlxalq hüququn əsas prinsiplərinə ziddir və dövlətlərarası münasibətlərə mənfi təsir göstərir.
Nazirlik dünya ölkələrini ABŞ-nin tətbiq etdiyi və beynəlxalq hüquqa zidd hesab etdiyi sanksiyaların icrasından çəkinməyə çağırıb.
Rəsmi Tehran hesab edir ki, birtərəfli məhdudlaşdırıcı tədbirlərin genişləndirilməsi qlobal sabitliyə ciddi zərər vura və beynəlxalq münasibətlərdə gərginliyi daha da artıra bilər.
