OMM Redaksiyası
İran Prezidenti Məsud Pezeşkian ABŞ və İsrailin ölkəni hərbi yolla məğlub edə bilmədikdən sonra İranda daxili parçalanma yaratmağa çalışdığını bildirib. Bu barədə İranın dövlət xəbər agentliyi “IRNA” məlumat yayıb.
Pezeşkianın açıqlaması
Pezeşkian deyib ki, İranın düşmənləri müharibə yolu ilə xalqı təslim olmağa məcbur edə bilməyəcəklərini anlayıblar.
“İranın təcavüzkar düşmənləri bu gün başa düşüblər ki, İran xalqını müharibə ilə təslim edə bilməz və ölkəmizi bombalar və raketlərlə fəth edə bilməyəcəklər”, – prezident bildirib.
İnqilab Keşikçilərindən çağırış
İran İnqilab Keşikçiləri sentyabrın 29-da yayımlanan məktubda amerikalıları ABŞ Prezidenti Donald Trampın Konqresdəki müttəfiqlərinə səs verməməyə çağırıb.
Məktubda seçicilərə “Amerikanın hazırkı vəziyyətinə görə məsuliyyət daşıyan şər, aldadıcı və zorakı siyasətçiləri hakimiyyətdən uzaqlaşdırmaq” çağırışı edilib. Sənəddə siyasətçilərin “dünyanın dəyişdiyini” anlamalarının təmin olunmasının vacibliyi vurğulanıb.
ABŞ-da Nümayəndələr Palatasına və Senatdakı bəzi yerlərə seçkilər noyabrın 3-də keçiriləcək.
Qeyd olunur ki, Tramp 2024-cü il seçki kampaniyası zamanı yeni müharibələrdən yayınacağına, mövcud münaqişələri dayandıracağına və inflyasiyanı azaldacağına söz verib. İranla müharibənin qlobal yanacaq qiymətlərinin artmasına və Yaxın Şərqdə gərginliyin yayılmasına təsir etdiyi bildirilir.
