Aprelin 1-də Küveyt Beynəlxalq Hava Limanı İranın pilotsuz uçuş aparatlarının (PUA) hücumuna məruz qalıb və nəticədə yanacaq çənlərində güclü yanğın baş verib.
“Operativ Məlumat Mərkəzi-OMM” xəbər verir ki, bu barədə Yaxın Şərq KİV-ləri Küveyt Mülki Aviasiya Baş İdarəsinin rəsmi nümayəndəsi Abdulla Əl-Raciyə istinadən məlumat yayıb.
"Hücumun hədəfi yanacaq çənləri olub. Bu da hadisə yerində böyük yanğına səbəb olub, ölən olmayıb", - deyə rəsmi nümayəndə bildirib.
Bununla paralel olaraq, Britaniya Dənizçilik Agentliyindən verilən məlumata görə, Fars körfəzində, Doha (Qətər) sahillərində neft tankerinə də hücum edilib. Qurum qeyd edir ki, gəminin gövdəsi sol tərəfdən zədələnsə də, ekipaj heç bir xəsarət almayıb.
İlkin baxış zamanı dənizə neft sızması qeydə alınmayıb. Hazırda müvafiq hakimiyyət orqanları baş vermiş hadisələrlə bağlı ətraflı araşdırma aparır.
