İran dövlət televiziyası son 24 saat ərzində 32 gəminin Hörmüz boğazından keçmək üçün rəsmi icazə aldığını açıqlayıb.
“Operativ Məlumat Mərkəzi-OMM” xəbər verir ki, məlumatda gəmilərin keçidinin İslam İnqilabı Keşikçiləri Korpusu (SEPAH) donanması və digər dənizçilik orqanları ilə koordinasiya edildiyi bildirilib.
Hesabata görə, icazə alan gəmilər arasında beş supertanker də yer alıb. Bildirilir ki, həmin tankerlər İranın, xüsusilə də SEPAH donanmasının nəzarəti və razılığı ilə strateji su yolundan keçiblər.
İran tərəfi Hörmüz boğazında təhlükəsizlik və nəzarət tədbirlərinin davam etdiyini vurğulayıb. Mütəxəssislər isə bölgədə artan gərginlik fonunda bu addımın qlobal enerji bazarları üçün xüsusi əhəmiyyət daşıdığını qeyd edirlər.
Qeyd edək ki, Hörmüz boğazı dünya neft və qaz daşımalarının mühüm hissəsinin həyata keçirildiyi strateji marşrutlardan biri hesab olunur.
