OMM Redaksiyası
İranın ali rəhbərliyi BMT Baş Assambleyasının Nyu-Yorkda keçirilən sessiyasından Tehranın regional və beynəlxalq mübahisələr üzrə mövqeyini çatdırmaq üçün istifadə edir. İran rəsmiləri yüksək səviyyəli görüşlər keçirir, ABŞ mediası və beyin mərkəzlərinin nümayəndələri ilə əlaqə saxlayır, həmçinin sosial media platformalarından yararlanırlar.
Bu təşəbbüslər ABŞ ərazisində hərbi güc nümayişi deyil, Vaşinqtonun “yumşaq güc” alətlərindən istifadə etməklə İranın mövqeyinin ifadə olunması kimi təqdim edilir. Əsas müzakirə mövzuları arasında İran-ABŞ qarşıdurması, Yaxın Şərqdəki vəziyyət və Tehranının nüvə proqramı yer alır.
Pezeşkian “Fox News”a müsahibə verib
İran prezidenti Məsud Pezeşkian BMT Baş Assambleyasının builki sessiyasında sıx görüş qrafiki ilə iştirak edir. O, Pakistan, Livan və Niderlandın baş nazirləri ilə görüşüb, həmçinin amerikalı baş redaktorlar, aparıcı jurnalistlər və beyin mərkəzlərinin nümayəndələri ilə birgə toplantıya qatılıb.
Pezeşkian sentyabrın 24-də ABŞ prezidenti Donald Trampa yaxın mövqeyi ilə tanınan “Fox News” telekanalına eksklüziv müsahibə verib. İran prezidenti müsahibə zamanı Yaxın Şərqdəki münaqişəyə görə ABŞ-ı məsul tutub və BMT-nin nəzarəti altında olan Tehran nüvə proqramının hərbi aspekt daşıdığını istisna edib.
O, diplomatik proseslərin sonradan pozulmasına görə Vaşinqtonu tənqid edib və münaqişənin başa çatdırılması barədə razılaşma əldə etmək üçün Tehranın danışıqlara hazır qaldığını bildirib.
Əraqçi tərəfdaşları ilə görüşlər keçirib
İranın xarici işlər naziri Abbas Əraqçi isə BMT-nin mənzil-qərargahında diplomatik heyətə rəhbərlik edərək Rusiya, Böyük Britaniya, İordaniya və Ukraynadakı həmkarları ilə ikitərəfli görüşlər keçirib.
Ukraynanın xarici işlər naziri ilə görüş iyul ayında Xəzər dənizində İranın ticarət gəmisinə edilən və insan tələfatı ilə nəticələnən hücum fonunda xüsusi əhəmiyyət daşıyıb. İordaniyanın xarici işlər naziri ilə görüş isə İranın daha əvvəl bu ölkənin ərazisindəki ABŞ hərbi bazalarına cavab ballistik raket zərbələri endirməsi baxımından diqqət çəkib.
Əraqçi həftənin əvvəlində Avropa İttifaqının xarici siyasət üzrə ali nümayəndəsi Kaya Kallas və bir sıra avropalı həmkarları ilə də görüşüb. İran rəsmisinin İsrail və ABŞ-ın İrana qarşı müharibəsi, eləcə də Tehranın mülki nüvə proqramı ilə bağlı Avropanın mövqeyini tənqid etdiyi bildirilib.
İran Avropanı xəbərdar edib
Əraqçinin müavini Kazım Qəribabadi Avropanın ABŞ-ın İrana qarşı hava zərbələrində iştirakının cavabsız qalmayacağını deyib. O, bu fikri NATO-nun baş katibi Mark Ruttedən Avropa bazalarından ABŞ əməliyyatını dəstəkləmək üçün təxminən 5 min uçuş həyata keçirildiyini bildirməsindən sonra “X” platformasında paylaşdığı yazıda ifadə edib.
