OMM Redaksiyası
İran və Rusiya regionda davam edən münaqişənin diplomatik yollarla həlli üçün çağırışlarını yeniləyib. AnewZ-nin məlumatına görə, bu barədə Rusiyanın xarici işlər naziri Sergey Lavrovun bazar ertəsi Tehrana səfəri zamanı aparılan danışıqlardan sonra bildirilib.
İranın xarici işlər naziri Abbas Əraqçi Lavrovla birgə mətbuat konfransında deyib ki, Tehran və Moskva hərbi əməliyyatların regiondakı gərginliyi həll edə bilməyəcəyi barədə razılığa gəlib. O, siyasi və diplomatik təmasların vacibliyini vurğulayıb.
Əraqçi qeyri-sabitliyin səbəbi kimi ABŞ və İsraili göstərib, onların İrana qarşı hərbi kampaniyasını və ölkəyə tətbiq olunan iqtisadi blokadanı qeyd edib. “Biz bilirik ki, bu qeyri-sabit vəziyyət ABŞ və İsrailin İrana qarşı başladığı hərbi təcavüzün birbaşa nəticəsidir”, – o deyib. Əraqçinin sözlərinə görə, müharibə və iqtisadi blokada regiondakı qeyri-sabitliyin əsas səbəblərindəndir.
O, Tehranın və Moskvanın ABŞ-ın “təcavüzkar birtərəfli siyasəti” adlandırdığı yanaşmaya qarşı olduğunu bildirib. Əraqçi beynəlxalq səviyyədə çoxtərəfliliyin gücləndirilməsi və beynəlxalq hüququn qorunması üçün əməkdaşlıq edəcəklərini deyib. O, xarici hərbi qüvvələrin iştirakı olmadan, region ölkələrinin rəhbərliyi ilə təhlükəsizlik mexanizminin yaradılmasına çağırıb.
İqtisadi və nüvə enerjisi sahələrində əməkdaşlıq
Lavrov Əraqçi ilə danışıqları “məhsuldar, şəffaf və səmimi” adlandırıb. O, iki ölkə arasında iqtisadi əlaqələrin artdığını vurğulayaraq, “İkitərəfli ticarətdə sürətli və davamlı artım müşahidə edirik”, – deyib.
Rusiyanın xarici işlər naziri rusiyalı texniki mütəxəssislərin və ekspertlərin İranın cənubundakı Buşehr Atom Elektrik Stansiyası layihəsinə tədricən qayıtdığını bildirib. O, bunun nüvə enerjisi sahəsində əməkdaşlığın davam etdiyini göstərdiyini qeyd edib.
Lavrov karbohidrogenlərin hasilatı və tranziti üzrə əməkdaşlıq imkanlarına da toxunub, Rusiyanın qlobal enerji bazarlarında sabitliyi dəstəklədiyini bildirib.
Əraqçi “X” sosial şəbəkəsindəki paylaşımında Lavrovla Avropadan Qərbi Asiyayadək müxtəlif məsələləri, o cümlədən Livan, Fələstin, Ukrayna və Yəməni müzakirə etdiklərini yazıb. O, iqtisadi və nüvə sahələrində əməkdaşlığın genişləndirilməsinin də müzakirə olunduğunu bildirərək, “Tariximizdə İran və Rusiya indiki qədər sıx əməkdaşlıq etməyib”, – deyə qeyd edib.
Pezəşkian enerji, nəqliyyat və ticarəti prioritet sayıb
Lavrov səfər çərçivəsində İran Prezidenti Məsud Pezeşkianla da görüşüb. İran Prezident Administrasiyasının məlumatına görə, tərəflər ikitərəfli münasibətləri, strateji əməkdaşlığı və regiondakı vəziyyəti müzakirə ediblər.
Pezeşkian mövcud razılaşmaların icrasını sürətləndirməyin vacibliyini vurğulayıb, enerji, nəqliyyat və ticarəti əsas prioritetlər kimi göstərib. O, Moskvaya planlaşdırdığı səfərin mövcud öhdəliklərin, xüsusilə enerji, infrastruktur və nəqliyyat sahələrində, konkret nəticələrə çevrilməsinə kömək edə biləcəyini deyib.
İran prezidenti ABŞ və İsrailin İrana qarşı hərbi kampaniyasını tənqid edib. O, İranın infrastrukturuna hücumların, eləcə də yüksək vəzifəli şəxslərin, alimlərin və məktəblilərin ölümünün beynəlxalq normaları pozduğunu bildirib.
Pezeşkian münaqişə zamanı Rusiyanın dəstəyinə görə təşəkkür edib və qarşılıqlı hörmət, dialoq və əməkdaşlığa əsaslanan regional təhlükəsizlik mexanizminin yaradılmasının vacibliyini təkrarlayıb. O, regiondakı ABŞ hərbi bazalarının gərginlik və qeyri-sabitliyin artmasına töhfə verdiyini də bildirib.
Lavrov Əraqçi və Pezeşkianla görüşlərindən əlavə, İran Ali Milli Təhlükəsizlik Şurasının katibi Möhsün Rzai ilə danışıqlar aparıb. Rusiya Xarici İşlər Nazirliyinin məlumatına əsasən, Lavrov Moskvanın İran ətrafındakı vəziyyətin həllinə yardım etməyə hazır olduğunu bir daha təsdiqləyib. O, həmçinin İran rəsmilərinə bazar günü Bəhreyndə Ərəbistan yarımadası ölkələrinin nümayəndələri ilə apardığı müzakirələr barədə məlumat verib.
