İordaniyanın paytaxtı Amman şəhərində, ölkənin ilk dəfə iştirak etdiyi Dünya Çempionatı çərçivəsində keçirilən İordaniya-Əlcəzair matçı zamanı xoşagəlməz hadisə qeydə alınıb.
"Operativ Məlumat Mərkəzi-OMM" xarici KİV-ə istinadən xəbər verir ki, Haşimi meydanında oyunu birgə izləmək üçün toplaşan minlərlə azarkeş arasında matçın gedişatında kütləvi sıxlıq yaranıb.
İordaniyanın 2-1 hesabı ilə məğlub olduğu qarşılaşma zamanı meydandakı insan axını idarəolunmaz hala çatıb.
Hadisə yerinə dərhal təcili tibbi yardım briqadaları cəlb edilib. Rəsmi məlumatlara görə, sıxlıq nəticəsində xəsarət alan 9 nəfər dərhal xəstəxanalara çatdırılıb.
Təəssüf ki, həkimlərin səylərinə baxmayaraq, onlardan biri aldığı ağır xəsarətlər səbəbindən dünyasını dəyişib. Digər 8 nəfərin vəziyyətinin isə yüngül və orta ağır olduğu bildirilir.
Hazırda yerli hakimiyyət orqanları və hüquq-mühafizə qüvvələri hadisənin dəqiq səbəblərini araşdırmaq üçün təhqiqatlara başlayıb. Meydanda yaranan həddindən artıq sıxlığın təhlükəsizlik qaydalarına riayət olunmaması və ya kütlənin gözləniləndən çox olması ilə bağlı olub-olmadığı müəyyənləşdirilir.
