İngiltərə, İspaniya və Fransa 2026/27 mövsümünün Millətlər Liqasında yarımfinal və final oyunlarını keçirmək üçün namizədlər arasındadır. BBC Sport xəbər verir ki, bu ölkələrin futbol federasiyaları turnirin həlledici mərhələsinə ev sahibliyi etməyə maraq göstərir.
Üç ölkənin nümayəndələri yarışın təşkilinə dair məsələni müzakirə etmək üçün artıq UEFA ilə əlaqə saxlayıblar.
İngiltərə Futbol Assosiasiyası mümkün stadion variantlarını müzakirə etməyə davam edir. Bununla belə, Londonun “Uembli” stadionunun həmin tarixlərdə turnir üçün əlçatan olub-olmayacağı hələ məlum deyil.
Millətlər Liqasının final mərhələsində iki yarımfinal, üçüncü yer uğrunda oyun və final qarşılaşması keçiriləcək. Oyunların 2027-ci il iyunun 9-dan 13-dək təşkili planlaşdırılır.