OMM Redaksiyası
FIFA prezidenti Canni İnfantino Bakıda 15 yaşadək oğlanlar arasında ilk dünya çempionatı və festivalının açılış mərasimindən sonra Azərbaycan Prezidenti İlham Əliyevlə birlikdə vaxt keçirməsi barədə paylaşım edib.
İnfantino instaqram hesabında dövlət başçısı ilə Azərbaycan millisinin açılış oyununu izləməkdən məmnunluğunu ifadə edib. O bildirib ki, matç zamanı futbol sevgisindən və bu oyunun insanlara ümid vermək, üzlərdə təbəssüm yaratmaq, körpülər qurmaq və ömürlük dostluqlar formalaşdırmaq gücündən danışıblar.
FIFA rəhbəri turnirin Bakıda keçirilməsində İlham Əliyevin və onun rəhbərlik etdiyi hökumətin dəstəyinin həlledici rol oynadığını vurğulayıb. Onun sözlərinə görə, FIFA-ya üzv 189 assosiasiyanı təmsil edən gənc istedadlara arzularını dünya səhnəsində gerçəkləşdirmək imkanı yaratmaq üçün birgə çalışmaqdan qürur duyurlar.
İnfantino digər paylaşımında açılış mərasimini yüksək qiymətləndirib və İlham Əliyevə, Baş nazirin müavini Samir Şərifova, Azərbaycan hökumətinə, AFFA prezidenti Rövşən Nəcəfə, FIFA-dakı həmkarlarına və yarışın təşkilində əməyi olanlara təşəkkür edib. O, altı konfederasiyanın hamısından olan gənclərin turnirdə bir araya gəldiyini qeyd edib.
Oktyabrın 24-də Bakı Kristal Zalında keçirilən açılış mərasimində İlham Əliyev, birinci xanım Mehriban Əliyeva, ailə üzvləri və Canni İnfantino iştirak ediblər. Açılışdan sonra Azərbaycan millisi Timor-Leste yığmasını 6:0 hesabı ilə məğlub edib.
