İndoneziya Semeru Vulkan Müşahidə Stansiyasının rəsmisi Sigit Rian Alfian yerli mətbuata açıqlama verərək, bu gün 16 püskürmənin baş verdiyi vulkanın ətraf mühitə, xüsusilə şimal-şərqə böyük miqdarda qaynar kül səpməyə başladığını bildirib.
"Operativ Məlumat Mərkəzi-OMM" xarici mediaya istinadən xəbər verir ki, birinci partlayış səhər saat 7:10-da, ikincisi isə 8:40-da baş verib. Partlayışların hər biri 81-110 saniyə arasında davam edib.
Səlahiyyətlilər Semerudakı aktivliyə görə bölgə xalqına diqqətli olmaları barədə xəbərdarlıq edərək, vulkanın təsirinə məruz qalan ərazinin aktivliyin intensiv olduğu şimal-şərqdə 13 kilometr, digər bölgələrdə isə 5 kilometr olduğunu bildirib.
Digər tərəfdən, 2021-ci ilin dekabrında vulkanın püskürməsi nəticəsində 34 nəfər ölüb.
