Hollandiya Ukrayna qüvvələrinin qurudakı vəziyyətini gücləndirmək məqsədilə pilotsuz təyyarələrin (PUA) tədarükü üçün əlavə 90 milyon avro sərmayə ayıracaq.
"Operativ Məlumat Mərkəzi-OMM" xəbər verir ki, bu barədə NATO müdafiə nazirlərinin planlaşdırılan görüşü öncəsi Hollandiyanın müdafiə naziri Ruben Brekelmans məlumat verib.
Qeyd edilib ki, bu qərar Hollandiyanın Ukraynaya davam edən hərbi dəstəyinin bir hissəsidir.
"Biz Ukraynaya pilotsuz təyyarələrin tədarükünü genişləndirmək niyyətindəyik və bu məqsədlə əlavə 90 milyon avro ayırırıq", - deyə nazir bildirib.
Brekelmans vurğulayıb ki, NATO ölkələri Kiyevə ordunun cəbhədəki mövqelərini yaxşılaşdırmaqda kömək etməlidirlər.
O, həmçinin alyansın hava hücumundan müdafiə imkanlarının artırılmasının vacibliyini qeyd edib. Nazir, PUA-ların öz dəyərindən daha baha başa gələn raketlərlə vurulmasının səmərəsiz olduğunu və bu yanaşmanın mənasız olduğunu diqqətə çatdırıb.
