Hindistanda daşqınlar: ölənlərin sayı 100-ə çatdı

Hindistanın Assam ştatında davam edən güclü daşqınlar nəticəsində insan tələfatı artıb.

“Operativ Məlumat Mərkəzi – OMM” xəbər verir ki, Assam Ştatının Fəlakətlərin İdarə Olunması Agentliyinin (ASDMA) son məlumatına görə, son sutka ərzində daha 2 nəfər daşqınların qurbanı olub. Bununla da, təbii fəlakət nəticəsində ölənlərin ümumi sayı 100 nəfərə çatıb.

Məlumata görə, ştatın 25 bölgəsində 1,1 milyondan çox insan daşqınlardan zərər çəkib. Assamın Baş naziri Himanta Biswa Sarma vəziyyətlə bağlı “X” hesabında açıqlama yayıb.

Güclü yağışlar bölgənin kənd təsərrüfatına da ciddi ziyan vurub. Mütəxəssislərin məlumatına görə, 16 min 951 hektar kənd təsərrüfatı sahəsi su altında qalıb.

Qeyd edək ki, Cənubi Asiyada iyun-sentyabr aylarında müşahidə olunan musson yağışları hər il Hindistan və Pakistan da daxil olmaqla bir sıra ölkələrdə genişmiqyaslı daşqınlara, dağıntılara və insan tələfatına səbəb olur.