Dövlət İmtahan Mərkəzi mayın 12-də inzibati rəhbər vəzifələrə aid olan AB, AC və inzibati icraçı vəzifələrə aid olan BA, BB vəzifə qruplarına uyğun vəzifələr üzrə dövlət qulluğunda fəaliyyətin davam etdirilməsi imtahanı və dövlət qulluğunda inzibati vəzifələrin A növünə aid olan AB və AC qruplarına uyğun vəzifələr üzrə qəbul imtahanı keçirəcək.

Bu barədə "Operativ Məlumat Mərkəzi-OMM"-ə DİM-dən məlumat verilib.

Dövlət qulluğunda inzibati vəzifələrin A növünə (inzibati rəhbər vəzifələr) aid olan AB və AC qruplarına uyğun vəzifələr üzrə qəbul imtahanı elektron qaydada təşkil olunacaq. İmtahanda iştirak üçün 117 namizəd qeydiyyatdan keçib.

Laçın şəhər 2 nömrəli tam orta məktəbin dörd şagirdi təhsilini Qarabağ Universitetində davam etdirməyi arzulayır.

"Operativ Məlumat Mərkəzi-OMM" xəbər verir ki, bunu "Azərbaycan müəllimi"nə açıqlamasında məktəbin direktor müavini Şəbnəm Uğurlu deyib.

O bildirib ki, təhsil müəssisəsi 43 şagirdlə fəaliyyətə başlasa da, hazırda məktəbdə 112 şagird təhsil alır:

"Onların əksəriyyəti paytaxt məktəblərindən gəlib. Təhsil prosesinin təşkili həm şagirdləri, həm də valideynləri olduqca qane edir. Məktəbdə müasir dövrün tələblərini özündə ehtiva edən fənn kabinetlərinin, laboratoriyaların, peşəkar təhsil işçilərinin olması ürəkaçandır. Məktəb psixoloqunun və bütün pedaqoji kollektivin səyi nəticəsində şagirdlərin adaptasiya prosesi olduqca asan həyata keçirilib. Belə ki, fərqli məktəblərdən gəlmələrinə baxmayaraq, şagirdlər sanki illərin dostudurlar. Onların maraq dairəsinə uyğun olaraq dərsdənkənar məşğələlər keçirilir, ekskursiyalar təşkil olunur".

Direktor müavini qeyd edib ki, şagirdlərin akademik göstəricilərini artırmaq məqsədilə bir çox bilik yarışları təşkil edilib.

"Onların fənn müsabiqələrində və olimpiadalarda iştirakı təmin olunub. Belə ki, səkkiz məktəblimiz Lütfi-Zadə adına məntiq olimpiadasına qatılıb, təbiət fənni üzrə dörd, riyaziyyat fənni üzrə müsabiqədə isə üç şagirdimiz iştirak edib. Olimpiadaya qatılan şagirdlərdən dördü ikinci mərhələyə keçmək hüququ əldə edib. “Qərbi Azərbaycana qayıdış olimpiadası”nda isə on şagird iştirak edib", - direktor müavini vurğulayıb.

Şəbnəm Uğurlunun sözlərinə görə, bu il məktəbin 15 şagirdi IX siniflərin buraxılış imtahanında iştirak edib, onlardan biri 232 bal toplayıb:

"Təhsilini bu il başa vuran dörd şagirdimizdən biri - Zəhra Quliyeva 215 bal toplayıb. Onlar təhsillərini Qarabağ Universitetində davam etdirməyi arzulayırlar".

Peşə təhsili müəssisələrində çalışan 10 nəfər cəzalandırılıb, birinin isə işi prokurorluqdadır.

"Operativ Məlumat Mərkəzi-OMM" “Azərbaycan müəllimi” qəzetinə istinadən xəbər verir ki, bu barədə Peşə Təhsili üzrə Dövlət Agentliyindən məlumat verilib.

Agentlikdən bildirilib ki, bu il ərzində keçirilən monitorinqlərin nəticəsi əsasında vəzifə səlahiyyətlərini yerinə yetirə bilməyən 11 şəxslə bağlı tədbir görülüb.

Belə ki, 1 nəfərə şiddətli töhmət, 4 nəfərə töhmət verilib. 2 nəfərə şifahi, 3 nəfərə yazılı xəbərdarlıq edilib. 1 nəfərin məsələsi isə hüquqi qiymətin verilməsi üçün aidiyyəti üzrə hüquq mühafizə orqanlarına göndərilib.

Bu gündən 2024-2025-ci tədris ili üzrə Bakı şəhəri və ölkənin müxtəlif bölgələrində yerləşən bir sıra lisey və gimnaziyalara ərizə qəbuluna başlanılır.

"Operativ Məlumat Mərkəzi-OMM" xəbər verir ki, lisey və gimnaziyalara şagird qəbulu mərkəzləşdirilmiş imtahan əsasında həyata keçiriləcək. Bunun üçün valideyn (və ya qanuni nümayəndə) şəxsi kabinetində “Sorğu yerləşdir” bölməsinə daxil olaraq “Mərkəzi imtahanla qəbul” düyməsini sıxmaqla imtahanın keçiriləcəyi mərkəzi seçməlidir.

Şagirdlər əvvəlcə mərkəzləşdirilmiş qəbul imtahanında iştirak etməli, sonra isə topladıqları bala müvafiq olaraq təhsil almaq istədikləri lisey və ya gimnaziyaların seçimini aparmalıdırlar. İmtahan zamanı şagirdlərə tədris dili və riyazi təfəkkürü ölçən standart və qeyri-standart suallar təqdim ediləcək. Ərizə qəbulu mayın 20-dən iyunun 13-dək davam edəcək.

Qeyd edək ki, lisey və gimnaziyalara qəbul imtahanı 7 və 8-ci siniflər üzrə iyunun 21-i, 6-cı siniflər üzrə iyunun 22-si, 5-ci siniflər üzrə iyunun 23-ü həyata keçiriləcək.

Dövlət təqaüdü ilə təhsil alan azərbaycanlı gənclər dünyanın ən nüfuzlu universitetlərində oxuyur.

Azərbaycanın Britaniyadakı Səfirliyindən "Operativ Məlumat Mərkəzi-OMM"-ə verilən məlumata görə, bu sözləri respublikamızın elm və təhsil naziri Emin Əmrullayev Birləşmiş Krallığa səfəri çərçivəsində Britaniya universitetlərində dövlət təqaüdü ilə təhsil alan azərbaycanlı tələbələrlə ölkəmizin krallıqdakı səfirliyində keçirdiyi görüşdə deyib.

E.Əmrullayev tələbələrə Azərbaycanda elm və təhsil sahəsində aparılan islahatlar və gələcək planlar barədə məlumat verib. Xüsusən işğaldan azad edilmiş ərazilərdə həyata keçirilməsi planlaşdırılan irimiqyaslı təhsil layihələrindən bəhs edən nazir Şuşada tikilməkdə olan unikal məktəb, eləcə də Xankəndidə tikilməkdə olan Qarabağ Universiteti və bu kontekstdə nəzərdə tutulan layihələrdən söz açıb.

Nazir bildirib ki, Qarabağ Universiteti əslində yeni məfhum deyil və 1969-cu ildən etibarən Xankəndidə mövcud olan pedaqoji universitetin davamıdır. Xankəndi Universitetində riyaziyyat, kompyuter elmləri, təbiətşünaslıq, turizm, musiqi, iqtisadiyyat və biznes, humanitar və digər sahələr olmaqla müxtəlif ixtisaslar açılacaq. Məqsəd bu universiteti beynəlxalq elm və tədqiqat mərkəzi, həmçinin Qafqazın keyfiyyətli ali təhsil mərkəzinə çevirməkdir.

Bundan əlavə, xaricdə təhsil üzrə müxtəlif dövlət proqramları, ali təhsil ocaqları, ikili proqramlar, beynəlxalq təhsil layihələri barədə də danışan elm və təhsil naziri Azərbaycanda doktorantura təhsilinin inkişafı sahəsində görülməkdə olan işlər haqqında da məlumat verib.

E.Əmrullayev dövlət proqramı çərçivəsində azərbaycanlı tələbələrin daha çox dünyanın ən nüfuzlu və yüksək keyfiyyətli universitetlərinə qəbul olunmasının sevindirici hal olduğunu vurğulayıb, bu göstəricinin önümüzdəki illərdə də artan dinamika ilə davam edəcəyinə ümid ifadə edib.

Nazir sonra tələbələrin müxtəlif suallarını cavablayıb, xatirə şəkli çəkdirib.

Qeyd edək ki, elm və təhsil naziri 19-22 may tarixlərində London şəhərində keçirilməkdə olan Dünya Təhsil Forumunda iştirak etmək üçün Birləşmiş Krallıqda işgüzar səfərdədir.

Mayın 19-da paytaxtda ümumi təhsil müəssisələrinin VI siniflərində monitorinq təşkil olunub. Monitorinq tədris dili, təbiət və riyaziyyat fənləri üzrə aparılıb.

Bakı Şəhəri üzrə Təhsil İdarəsindən "Operativ Məlumat Mərkəzi-OMM"-ə bildirilib ki, paytaxt üzrə monitorinq üçün ayrılan 91 imtahan mərkəzində Azərbaycan və rus bölməsi olmaqla 50 minə yaxın VI sinif şagirdi biliyini sınayıb.

Şagirdlərə tədris dili fənni üzrə 25 qapalı sual, təbiət fənni üzrə 25 qapalı, riyaziyyat fənni üzrə isə 20 qapalı və 5 açıq sual təqdim olunub. Sualların cavablandırılması üçün 150 dəqiqə vaxt verilib.

Monitorinqdə şagirdlərə təqdim olunan tapşırıqlar tədris dilindən oxu və dil qaydaları məzmun xətlərini, riyaziyyat fənnindən ədədlər və əməllər, cəbr və funksiyalar, həndəsə, statistika və ehtimal məzmun xətlərini, təbiət fənnindən insan orqanizmi və sağlamlıq, canlıların müxtəlifliyi, maddələr və onların xassələri, enerji, qüvvə və hərəkət, ətraf mühit və biz məzmun xətlərini əhatə edib.

Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktor müavini Orxan Abbasov, Bakı Şəhəri üzrə Təhsil İdarəsinin müdir müavini Xəyalə Əhmədzadə və digər struktur bölmə rəhbərləri monitorinq prosesini izləyiblər.

Monitorinqin keçirilməsində məqsəd şagird nailiyyətlərinin yaxşılaşdırılması, məktəblilərdə müvafiq standartlar üzrə bilik və bacarıqların hansı səviyyədə formalaşdığının müəyyən edilməsi və tədrisin keyfiyyətinin artırılması istiqamətində tədbirlərin görülməsindən ibarətdir.

Monitorinqin nəticəsi şagirdlərin summativ qiymətləndirmə ballarına, eləcə də onların sinifdən-sinfə keçmələrinə təsir göstərmir.

Xatırladaq ki, mayın 18-də ümumi təhsil müəssisələrinin IV siniflərində monitorinq keçirilib. Ölkə üzrə mayın 18-19-da IV və VI sinif şagirdlərini əhatə edən monitorinqlərdə 300 min nəfərə yaxın şagird iştirak edib.

***

Dövlət ümumi təhsil müəssisələrinin VI sinif şagirdləri üçün monitorinq keçirilir.

Bu barədə "Operativ Məlumat Mərkəzi-OMM"-ə Məktəbəqədər və Ümumi Təhsil üzrə Dövlət Agentliyindən məlumat verilib. Bildirilib ki, monitorinqlər tədris dili, riyaziyyat və təbiət fənləri üzrə təşkil olunur.

Tapşırıqlar tədris dili fənnindən oxu və dil qaydaları məzmun xətlərini, riyaziyyat fənnindən ədədlər və əməllər, cəbr və funksiyalar, həndəsə, statistika və ehtimal məzmun xətlərini, təbiət fənnindən insan orqanizmi və sağlamlıq, canlıların müxtəlifliyi, maddələr və onların xassələri, enerji, qüvvə və hərəkət, ətraf mühit və insan məzmun xətlərini əhatə edir. İmtahanın müddəti 150 dəqiqədir. Tədris dili fənni üzrə 25 qapalı, təbiət fənni üzrə 25 qapalı, riyaziyyat fənni üzrə 20 qapalı və 5 açıq sual təqdim olunacaq.

Hər cavab bir balla qiymətləndirilir. Səhv cavablar düz cavablara təsir göstərmir.

Xatırladaq ki, mayın 18-də IV sinif şagirdləri üçün monitorinq keçirilib. Monitorinqlərdə istifadə edilən qiymətləndirmə vasitələri IV və VI siniflər üzrə müəyyənləşdirilmiş məzmun standartları əsasında hazırlanır. Monitorinqdə ümumilikdə 300 minə yaxın məktəbli iştirak edəcək. Bütün dövlət ümumi təhsil müəssisələrində IV və VI siniflər üzrə şagirdlərin monitorinqdə iştirakı icbaridir. Yalnız üzrlü səbəblər olduğu təqdirdə onlar monitorinqdə iştirak etməyə bilərlər.

Monitorinqlərin keçirilməsində məqsəd şagird nailiyyətlərinin yaxşılaşdırılması, bilik və bacarıq göstəricilərinin müəyyən edilməsi, eyni zamanda, tədrisin keyfiyyətinin artırılmasıdır.

Bu monitorinqlərin nəticəsi şagirdlərin summativ qiymətləndirmə ballarına, eləcə də onların sinifdən-sinfə keçmələrinə təsir göstərmir.