OMM Redaksiyası
Fransanın Polis İnspeksiyası (IGPN) ölkə üzrə tələbə etirazları ilə əlaqəli 24 hadisəni araşdırır. Onlardan biri etiraz zamanı 14 yaşlı Edenin çənəsinin sınması və dişlərinin qırılması ilə bağlıdır. Yeniyetmənin polis mərmisinin zərbəsi nəticəsində xəsarət aldığı bildirilir.
Eden Sen-Oen-l’Omonda tələbə etirazları zamanı yaralanıb. Yerli prokurorun sözlərinə görə, o, nümayişdən bir neçə metr aralıda oturaraq telefonuna baxırmış. Polis əməkdaşı ona yaxınlaşaraq dəyənəklə vurub. Eden polisə təpiklə cavab verib, bundan sonra başqa bir əməkdaş “Cougar” qurğusundan gözyaşardıcı qaz qumbarası atıb və qumbara yeniyetmənin üzünə dəyib.
Edenin vəkili Elza Marsel bildirib ki, polis əməkdaşı onu ağzından vurub və təcili yardım çağırmadan yerdə qoyub. Prokurorluğun məlumatına əsasən, hadisədən səkkiz gün sonra həmin əməkdaş barəsində vəzifəli şəxsin törətdiyi və daimi əlillik və ya eybəcərləşmə ilə nəticələnən xəsarət yetirmə ittihamı üzrə rəsmi istintaq başlanıb.
Son iki həftədən artıqdır davam edən tələbə etirazları zamanı digər şəxslərin də rezin güllələrdən göz nahiyəsindən xəsarət aldığı və ya görmə qabiliyyətini itirdiyi bildirilir. Lens şəhərində isə 15 yaşlı yeniyetmənin səs qumbarasının zərbəsindən əlini itirdiyi iddia olunur.
Fransanın baş naziri Sebastyan Lekornu nümayişləri son onilliklərin ən zorakı etirazları kimi xarakterizə edib. Daxili işlər naziri Loran Nyunezin sözlərinə görə, etirazlarda təxminən 200 şagird xəsarət alıb. Rəsmilər 700-ə yaxın polis əməkdaşının yaralandığını, əsasən yetkinlik yaşına çatmayan 6 887 nəfərin saxlanıldığını da bildiriblər.
Etirazlar zamanı müəllimlərə və digər şəxslərə də hücum edilib, bir neçə məktəb isə yandırılıb və ya talan olunub.
Fransada az öldürücü silahların istifadəsi müzakirə edilir
Hadisələr Fransa polisinin rezin güllə və səs qumbarası kimi “az öldürücü” adlandırılan vasitələrdən istifadəsi ilə bağlı müzakirələri yenidən gündəmə gətirib. Fransa bu vasitələrin ictimai asayişin qorunmasında tətbiq edildiyi azsaylı Avropa ölkələrindən biridir. Böyük Britaniya, İtaliya və Almaniyada bu məqsədlə onlardan, Hamburq istisna olmaqla, istifadə edilmir.
“Amnesty International” kimi insan hüquqları təşkilatları və bəzi siyasətçilər ağır xəsarətlərə səbəb ola bildiklərini əsas gətirərək bu silahların istifadəsinin tam qadağan olunmasına çağırıblar.
Solçu “Fransa Əyilməz” partiyasından olan bələdiyyə sədri Balli Baqayoko “Reuters” agentliyinə deyib ki, rezin güllələrin istifadəsinə son qoyulmalı və xəsarət alan şagirdlərin sayının sıfıra endirilməsi hədəflənməlidir. Onun fikrincə, bu, gərginliyin azaldılmasına imkan verər.
Polis həmkarlar ittifaqları isə zorakı nümayişlər zamanı asayişin qorunması və əməkdaşların təhlükəsizliyi üçün belə vasitələrə ehtiyac olduğunu bildirirlər. Həmkarlar ittifaqının nümayəndəsi Tyerri Kler Edenin və əlini itirən yeniyetmənin xəsarətlərini faciə adlandırsa da, bu hadisələrin Fransanın polis fəaliyyətinə yanaşmasının bütövlükdə rədd edilməsinə səbəb olmamalı olduğunu deyib.
Kler gərginliyin artmasını bəzi gənc etirazçıların zorakılığı ilə əlaqələndirib və qarşıdurmalara cavab vermək üçün polisin müvafiq vasitələrə ehtiyacı olduğunu bildirib. “İnsanlar qarşıdurmaya doğru irəliləyəndə necə cavab verməliyik? Aralıq güc vasitələrini götürsək, əlimizdə yalnız öldürücü güc qalacaq. Bu, sadəcə olaraq, ağlasığmazdır”, – deyə o, “Reuters”ə bildirib.
