Fransada davam edən anomal isti hava şəraiti fonunda həftə sonundan etibarən sərinləmək üçün su hövzələrinə girən azı 13 nəfər boğularaq həyatını itirib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki,ölkənin böhranların idarə olunmasına cavabdeh olan Milli Mülki Təhlükəsizlik Xidmətinin sözçüsü Jerome Boulangerin sözlərinə görə, həyatını itirənlər arasında Poitiers şəhərində yaşayan 17 yaşlı yeniyetmə və Seine-et-Marne bölgəsində yaşayan 13 yaşlı uşaq da var.
Qeyd olunub ki, ölkənin 49 departamentində ən yüksək – qırmızı, 40 departamentində isə narıncı təhlükə səviyyəsinin elan edilib.
Həddindən artıq istilərlə əlaqədar olaraq Fransa Təhsil Nazirliyinin qərarı ilə bu gün 845 məktəbdə dərslər dayandırılıb.
Eyni zamanda, Touchay qəsəbəsində dünən günortadan sonra baş vermiş yanğın nəticəsində 25 hektar əkin sahəsinin külə döndüyü açıqlanıb. Yanğın səbəbindən 44 nəfər təxliyə olunub, yanğının söndürülməsi zamanı isə 3 yanğınsöndürən yüngül xəsarət alıb.
Rəsmilər yanğının lokallaşdırılması istiqamətində işlərin davam etdiyini bildiriblər.
