OMM Redaksiyası
Ermənistana gələnlərdə hərarət yoxlanıla bilər. Ölkənin səhiyyə naziri Anahit Avanesyan çərşənbə günü parlamentdə çıxışı zamanı Rusiyada laboratoriya əməkdaşının ağciyər taunu şübhəsi ilə ölümündən sonra belə tədbirin mümkün olduğunu bildirib. Bu barədə Ermənistanın dövlət xəbər agentliyi Armenpress məlumat yayıb.
Avanesyanın sözlərinə görə, Ermənistan Səhiyyə Nazirliyi Rusiyada ağır ağciyər infeksiyasının mümkün yayılması ilə bağlı məlumatları izləyir. Nazir məsələ ilə bağlı diqqətli olduqlarını və görülən işlərin əlaqələndirilmiş şəkildə aparıldığını deyib.
O əlavə edib ki, Rusiyadakı ölüm xəbəri yayılandan sonra Ermənistanın səhiyyə qurumları qabaqlayıcı tədbirləri həyata keçirməyə başlayıb.
ÜST Rusiyadan əlavə məlumat istəyib
BMT-nin Ümumdünya Səhiyyə Təşkilatı (ÜST) Sibirdə taun araşdırmaları laboratoriyasında çalışan 28 yaşlı əməkdaşın ölümü ilə bağlı Rusiyadan daha ətraflı məlumat tələb edib.
KİV-də yayılan, lakin təsdiqlənməyən məlumatlarda qadının patogen olan sınaq şüşəsini sındırdıqdan sonra xəstələndiyi iddia olunub.
Ağciyər taunu insanlar arasında birbaşa ötürülə bilən ağır ağciyər infeksiyasıdır. ÜST əvvəlcə açıqlanmış məlumatlar əsasında Rusiyadakı hadisənin ictimaiyyət üçün riskini aşağı qiymətləndirdiyini bildirsə də, çərşənbə günü daha dolğun risk qiymətləndirməsi üçün Rusiya rəsmilərindən kifayət qədər məlumat almadığını açıqlayıb.
ÜST-nin epidemiyalar və pandemiyaların idarə olunması departamentinin direktoru Maria Van Kerkhove virtual mətbuat konfransında laboratoriyada hansı testlərin aparıldığını, hansı patogenlərin yoxlanıldığını və qadın taun xəstəliyindən ölməyibsə, ölüm səbəbinin nə olduğunu anlamaq üçün daha çox məlumata ehtiyac duyduqlarını deyib.
Rusiya ehtimallarla bağlı ehtiyatlı olmağa çağırıb
Rusiyanın istehlakçı hüquqlarının müdafiəsi və insan rifahı sahəsinə nəzarət qurumu “Rospotrebnadzor” çərşənbə günü epidemiya təhlükəsinin olmadığı qənaətinə gəldikdən sonra qabaqlayıcı tədbirləri tədricən dayandırdığını bildirib. Qurum ən son məlumatları ÜST-yə ötürdüyünü də qeyd edib.
Kremlin sözçüsü Dmitri Peskov məsələ ilə bağlı yayılan ehtimallara ehtiyatla yanaşmağa çağırıb. Sibirdə daha bir nəfərin xəstələnməsi barədə məlumatlara münasibət bildirərkən o, hadisələrin gedişatını KİV xəbərlərinə əsasən qiymətləndirməyin düzgün olmadığını deyib. Peskov bu mövzuda yayılan xəbərlərin böyük əksəriyyətini yanlış məlumat adlandırıb.
Ermənistanın açıqlamasından əvvəl Monqolustan hökuməti Rusiya ilə sərhəddə “sağlamlıq nəzarəti” tədbirlərinin tətbiq edildiyini bildirmişdi. Litvanın Səhiyyə Nazirliyi də ölkədə mümkün yoluxma hallarına qarşı hazırlıq işlərinə başladığını açıqlayıb.
ABŞ Xəstəliklərə Nəzarət və Profilaktika Mərkəzlərinin direktoru Erica Schwartz çərşənbə günü qurumun səyahət edənləri izləməyə və yoxlamağa hazır olduğunu bildirib. Bununla belə, onun sözlərinə görə, ABŞ üçün risk son dərəcə aşağı olaraq qalır.
