Avropa İttifaqına çox yaxınlaşmağın Ermənistan üçün müəyyən xərci var.
"Operativ Məlumat Mərkəzi-OMM" xəbər verir ki, bunu İrəvanda Strateji Araşdırmalar və Təşəbbüslər üzrə Analitik Mərkəzin təşkil etdiyi konfransda rusiyalı politoloq Maksim Vaskov deyib.
Ekspert hesab edib ki, Brüssel hakimiyyətinin Ermənistana marağı əsasən İrəvanın regionda Moskvanın müttəfiqi olması ilə bağlıdır.
"Nə qədər ki, Ermənistanın Rusiya ilə müttəfiqlik münasibətləri davam edir, bu, İrəvanın Moskva ilə münasibətlərini tamamilə kəsməsindən daha çox Aİ-nin marağındadır. Rusiya Federasiyası ilə münasibətlərin tamamilə kəsiləcəyi təqdirdə, Aİ Ermənistana heç bir dəstək verməyəcək",- deyə ekspert bildirib.
Üstəlik, Aİ müəyyən mərhələdə Ermənistandan Rusiya və İranla bütün münasibətlərini keyfiyyətcə yenidən qiymətləndirməyi tələb edəcək. Ekspert Avropa İttifaqının bu iqtisadi və siyasi xərcləri kompensasiya edə biləcəyinə şübhə ilə yanaşıb.
Eyni zamanda, Vaskov bu gün Ermənistanla Rusiya arasında səmimi dialoqda həll olunmayan heç bir problem görmür.
"Son vaxtlar İrəvan getdikcə ən yüksək səviyyədə anti-Rusiya ritorikasını ifadə edir. İttihamlar Rusiya və KTMT-nin Ermənistan və Qarabağın təhlükəsizliyini təmin etmək gözləntiləri ilə bağlıdır. Ermənistan rəsmiləri bəyan edirlər ki, Qərb və ABŞ ilə münasibətlər bütün səviyyələrdə şaxələndirilməli və gücləndirilməlidir. Moskva hər zaman dialoqa açıq olduğunu deyir, lakin Qərbin açıq şəkildə Rusiyanın Cənubi Qafqazdan çıxarılmalı olduğunu bəyan etdiyini bilir".
