Türkiyə Prezidenti Rəcəb Tayyib Ərdoğan bölgədə sülhün təmini və müharibənin qarşısının alınması üçün Türkiyənin lazımi addımları tərəddüdsüz atacağını bəyan edib.
“Operativ Məlumat Mərkəzi-OMM” xəbər verir ki, bu barədə dövlət başçısı hakim Ədalət və İnkişaf Partiyasının (AK Parti) parlamentdəki qrup toplantısında danışıb.
Ölkəsini bu alovdan uzaq saxlamaqda qətiyyətli olduqlarını bildirən Türkiyə lideri, müharibənin regional daxili qarşıdurmaya çevrilmə riskinə diqqət çəkib: "Enerji, nəqliyyat və infrastruktur obyektlərinə yönəlmiş cavab zərbələri regional daxili qarşıdurmaları alovlandırır. Axan qanın dayandırılması, silahların susması və problemlərin diplomatiya yolu ilə həll oluna bilməsi üçün iynə ucu qədər ümid varsa, bunu dəyərləndirmək boynumuzun borcudur".
Ərdoğan əlavə edib ki, müharibənin başlanğıcından etibarən Türkiyənin prinsipial mövqeyi insanlığın və vicdanın səsi olub: "Bəşəriyyətin düşdüyü bu sıxıntılı vəziyyətdən çıxması üçün ən böyük imkan diplomatiya və dialoqdur. Maksimalist tələblərdə israr etmək əvəzinə, ortaq məxrəcə gəlməyə çalışmaq lazımdır. Bunu ağıl da tələb edir, vicdan da. Beynəlxalq hüquq və ədalət də bunu zəruri edir. Ümidimiz odur ki, sağlam düşüncənin hakim olduğu, daha çox qan tökülmədən sülhə gedən yol açılsın. Biz bunun üçün lazım gələrsə bütün gücümüzlə səylərimizi davam etdirəcəyik".
