Afət Ziyadqızı
İran İslam Respublikasının xarici işlər naziri Abbas Əraqçi İsrailin Baş naziri Benyamin Netanyahunun rəsmi Tehrana qarşı səsləndirdiyi təhdid dolu bəyanatlara kəskin reaksiya verib.
"Operativ Məlumat Mərkəzi-OMM" xəbər verir ki, Türkiyənin "TRT Haber" telekanalının yaydığı məlumata əsasən, iranlı diplomat "X" sosial şəbəkəsindəki rəsmi hesabında paylaşım edərək İsrail rəhbərliyini ittiham edib. A.Əraqçi Netanyahunun öz siyasi gələcəyini qorumaq və məhkəmə Məsuliyyətindən, mümkün həbsdən yayınmaq məqsədilə Birləşmiş Ştatları yeni bir genişmiqyaslı müharibəyə çəkməyə çalışdığını bildirib.
İran XİN rəhbəri əvvəlki hərbi zərbələrə və təzyiqlərə baxmayaraq, ölkəsinin müdafiə qabiliyyətini daha da gücləndirdiyini iddia edib:
“Ötən dəfə İranı ‘bitirmək’ istəyəndə ölkəmiz bu sınaqdan daha da güclənərək çıxdı. Şansınızı bir daha sınamaq istəyirsiniz? Buyurun, sınayın. Lakin ehtiyatlı olun, bizim də hələ tamamlanmamış işlərimiz var”, – deyə A.Əraqçi vurğulayıb.
“The Times of Israel” nəşrinin yaydığı məlumata görə, İsrailin Baş naziri Benyamin Netanyahu oktyabrın 27-də keçiriləcək parlament seçkilərinin İsrail Dövlətinin mövcudluğu baxımından həyati önəm daşıdığını bəyan edib. B.Netanyahu təqdim etdiyi yeni təhlükəsizlik doktrinasında birbaşa Tehrandakı mövcud rejimin devrilməsi hedafini ortaya qoyub.
İsrail Baş naziri İranın dərinləşən iqtisadi böhran fonunda daxili sosial narazılıqların artdığını və bunun yeni kütləvi etirazlara zəmin yaratdığını iddia edib.
“İrandakı rejimin süqutuna nail olmaq üçün əhatəli və qətiyyətli fəaliyyət planımız mövcuddur. Bütün təhlükəsizlik və kəşfiyyat strukturlarına verdiyim birbaşa tapşırıq bundan ibarətdir”, – deyə Netanyahu bildirib.
